स्वनिगलय् संक्रमितत न्हियान्हिथं अप्वल, थौं जक ५४ म्ह थप

येँ – नेपालय् न्हियान्हिथं कोरोना संक्रमित जूपिनि ल्याः म्हो जुया वनाच्वंसां स्वनिगलय् धाःसा न्हियान्हिथं संक्रमिततय् ल्याः अप्वया वनाच्वंगु दु । थ्व हे झ्वलय् थौं जक स्वनिगलय् ५४ म्हेसिके कोरोना संक्रमण खनेदुगु दु । म्हिगः स्वनिगलय् ३२ म्ह संक्रमित खनेदुगु खः ।

स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं बियादीगु जानकारी कथं स्वनिगःया येँय् २४ म्ह, यलय् २० म्ह व ख्वपय् १० म्ह थप संक्रमितत खनेदुगु खः । मन्त्रालयं येँ, यल व ख्वपय् थ्वःम्ह थ्वःम्ह संक्रमित खनेदुगु धाःसा येँ, यल, ख्वपया गन गन च्वंपिं धयागु धाःसा जानकारी बिउगु मदुनि ।

थौं न्हिछिया दुने नेपाःयंकं धाःसा मुक्कं १८० म्ह जक संक्रमित खनेदुगु खः । म्हिगः नेपालय् २८३ म्हेसिके संक्रमण खनेदुगु खः । नेपाःन्यंकंया स्थितिइ ल्याः म्हो जूसां स्वनिगलय् धाःसा अप्वया वनेवं मन्त्रालयं स्वनिगलय् समुदायस्तरय् संक्रमण न्यंगु खः कि मखु स्वयेत झिगू थासय् नमूना स्वाब संकलन यानाः परीक्षण सुरु याःगु खः ।

झिगू थाय् मध्ये न्हापांगु चरणय् तीनकुने व नख्खुडोलय् यानाः २२८ म्हेसिया स्वाब संकलन यानाः पिसिआर परीक्षण याःगु खःसा थुपिं सकसियां रिपोर्ट धाःसा नेगेटिभ वःगु खँ धाःगु दु ।

थौंकन्हय् स्वनिगलय् ११७ म्ह स्वयां अप्वः कोरोना संक्रमितत उपचार याकाच्वंगु दनिगु खँ धाःगु दु । स्वनिगःया थुपिं संक्रमितत मध्ये १२ म्ह धाःसा छुं नं ट्राभल हिस्ट्रि मदुपिं खः । ट्राभल हिस्ट्रि मदयेक हे संक्रमण खनेदुपिं अप्वया वयेवं विज्ञतय्सं नं स्वनिगलय् समुदायस्तरय् कोरोना न्यनावंगु शंका यानाहःगु दु । विज्ञतय्सं आः स्वनिगलय् परीक्षणया दायरा अप्वयेकेमाःगु खँ धाःगु दु ।

स्वनिगलय् समुदायस्तरय् संक्रमण खनेदत धाःसा जोखिम तसकं अप्वइगु ख्याच्वः विज्ञतय्सं बियाच्वंगु दु । थ्व हे दथुइ मन्त्रालयं थीथी अस्पतालय् नं परीक्षणया दायरा अप्वयेकेगु तयारी याःगु दु । मन्त्रालयं क्यान्सर, चिनि ल्वय्या ल्वगि व इमर्जेन्सि व आइसियलय् भर्ना यानातःपिं विरामीतय् नं परीक्षण यायेगु खँ धाःगु दु ।

सम्बन्धित बुखँ

LEAVE YOUR COMMENTS