थनिंनिसें फोहोर मुनेगु ज्या न्ह्यात

येँ – नुवाकोटया सिसडोलय् च्वंपिं स्थानीय वासिन्दा व येँ महानगरपालिका दथुइ सहमति जुइवं थनिंनिसें फोहोर मुनेगु ज्या न्ह्याःगु दु । म्हिगः येँ मनपाया ज्याकुथी स्थानीय सिसडोलवासी व येँ मनपाया मेयर विद्यासुन्दर शाक्य दथुइ जूगु वार्ता लिपा सहमति जूगु खः ।

सिसडोलय् फोहोर वाकेगु बन्द जूगुलिं वंगु छुं न्हि न्ह्यवंनिसें येँ लगायत स्वनिगःया थीथी थासय् फोहोरया द्वँ मुनेगु शुरु जुयाच्वंगु खः । येँ मनपा वातावरण विभागया प्रमुख हरिकुमार श्रेष्ठं ‘नेपालभाषा टाइम्स’यात कनादी कथं म्हिगः जूगु सहमति लिपा थनिंनिसें हे सिसडोलय् फोहोर वाके बीगु जूगु खः । लिसें मनपां नं थनिंनिसें हे थाय्थासय् मुनाच्वंगु फोहोर मुना यंकीगु जूगु दु ।

वंगु न्यान्हु न्ह्यवंनिसें सिसडोलया स्थानीय वासिन्दां येँनं फोहोर ज्वनाः वंगु गाडीयात पनेगु शुरु याःगु खः । स्थानीय वासिन्दां प्रभावित क्षेत्रया स्थानीययात बिया वयाच्वंगु क्षतिपूर्ति अप्वयेकेमाःगु, ल्यं दनिगु क्षेत्र नं अधिग्रहण यायेमाःगु माग तयाः स्थानीयवासीं अन फोहोर वायेगु ज्याय् पंगः थना वयाच्वंगु खः ।

स्थानीयया माग पूवंकेगु निंतिं झिंस्वम्ह दुजः दुगु समिति गठन यायेगु सहमति म्हिगः जूगु खः । मनपा व आन्दोलन याना वयाच्वंगु निगुलिं पक्षया प्रतिनिधि दुथ्याइगु कथं समिति गठन याःगु खः । समितिं सिफारिस याः कथं महानगरं माग पूवंकेगु सहमति जूगु दु । समितिं अध्ययन यानाः महानगरपालिकायात प्रतिवेदन लःल्हाइगु व प्रतिवेदन कथं हे माग पूवंकेगु सहमति जूगु दु ।

थ्व स्वयां न्ह्यः शनिवाः सिसडोलय् स्थानीय वासिन्दां फोहोर वायेगु ज्याय् पंगः थनेवं ब्वलंगु विवादया झ्वलय् प्रहरीलिसे झडप समेत जूगु खः । उगु इलय् प्रहरीं लाठीचार्ज याःगु खः । म्हिगः मनपाय् वःपिं स्थानीय जनतां थःपिंत लाठीचार्ज याःगु खँय् नं कडा विरोध याःगु खः । सरकारं बञ्चरेडाँडाय् न्हूगु ल्याण्डफिल दयेकेगु ज्या नं न्ह्यानाच्वंगु दु ।