धर्मकीर्ति विहारया विस्तारित भवन शिलान्यास

येँ (नेपालभाषा टाइम्स) – धर्मकीर्ति महाविहार श्रीघः विस्तारित भवन शिलान्यास जूगु दु । म्हिगः छगू ज्याझ्वःया दथुइ येँ महानगरपालिकाया मेयर विद्यासुन्दर शाक्यं सिलान्यास यानादीगु खः ।

ज्याझ्वलय् न्ववानादिसें मेयर शाक्य सम्पदा संरक्षणया ज्यायात महानगरपालिकां प्राथमिकताय् तयाः निर्माण पुनर्निर्माण थेंज्याःगु ज्या यानाच्वंगु दु धासें धयादीगु दु, ‘क्वाःपाः द्यःछेँ, बहाः, बही, सतः थेंज्याःगु सांस्कृतिक सम्पदा निर्माण, पुनर्निर्माण अभियानयात महानगरपालिकां प्राथमिकताय् तयाः न्ह्याः वनाच्वंगु दु ।’

मानव निर्मित सम्पदापाखें सम्पन्न येँ देय् जूगु धासें वय्कलं येँया दुनेया सम्पदायात येँ पिनेया सम्पदालिसे स्वानाः पर्यटन क्षेत्रया विकास यायेगु व स्थानीय आयय् बृद्धि यायेगु योजना कथं येँ महानगरपालिकां लुम्बिनी प्रदेशया रामग्राम नगरलिसे भगिनी स्वापू कायम यानागु व भगवान बुद्धया पाजुपिनि छेँ लाःगु पण्डितपुरय् कोलिय शान्ति पार्क दयेकेत छगू करोड ५० लाख तका ग्वाहालि बियागु खँ नं धयादीगु दु ।

धर्मकीर्ति महाविहारया म्हिगः शिलान्यास जूगु विस्तारीत भवन दयेकेत प्यंगू करोड २८ लाख तुइगु खँ धाःगु दु । भवन निर्माण उपभोक्ता समितिया संयोजक अभयरत्न कंसाकारया कथं थ्व भवन दयेकेगु झ्वलय् न्हापांगु चरणय् छगू करोड खर्च जुइ । थुकिया १५ प्रतिशत उपभोक्ता समितिं व्यहोरोय् याइसां ल्यं दुगु ८५ प्रतिशत येँ महानगरपालिकाया ग्वाहालिं दयेकीगु जुइ । थ्व ल्याखं येँ महानगरपालिकां न्हापांगथु चरणया भवन दयेकेत ८४ लाख ९९ हजार २९० तका खर्च बीगु जूगु दु ।

सम्बन्धित बुखँ

LEAVE YOUR COMMENTS