थिमिया नेवाःतय् ‘शान्ति खलः’
स्वनिगःया मध्यपुर थिमि नगरपालिका क्षेत्र दुने च्वना वयाच्वंपिं ‘श्रेष्ठ’ थरया दाजुकिजा तताकेहेँपिं थीथी कारणं थःगु जन्मभूमि थिमि त्वःताः येँय् च्वं वयाच्वंगु दु । थथे येँय् च्वं वयाच्वंपिं थिमिया ‘श्रेष्ठ’ थरयापिं दथुइ ग्वाहालि, सद्भावया निंतिं एकता व मित्रता कायम यानातयेगु निंतिं २०३६ सालय् ‘शान्ति खलः’या जन्म जूगु खः ।
उबलय् शान्ति खलः नीस्वनेत विशेष यानाः झिंन्याम्हेसितं अथक कुतः यानादीगु खः । शान्ति खलः नीस्वने धुंकाः आर्थिक अभाव जूसां उबलय् न्हून्हूपिं दुजः दयेका यंकेगु व पुलांपिं दुजःपिंत नं आर्थिक ग्वाहालि बिया वनेगु निंतिं पानीपोखरीइ च्वंगु भानुभक्त माध्यमिक विद्यालयय् छगू बुद्धिजिवी भेला जुल ।
उबलय् मुंपिं ३५ म्ह पाखें म्हतिं झिद्वः दर दां दुथ्याकाः छगू कोष दयेकेगु ज्या जुल । थुगु ध्यबापाखें वःगु ब्याज नं कोषय् दुथ्याका यंकु यंकुं आर्थिक क्षेत्रय् न्हूगु पलाः न्ह्याकेगु ज्या जुल । थीथी पंगःत वयाच्वंसां अन्तत थ्व शान्ति खलकं सरकारी वैधानिकता चूलाकल । खलःया सकलें दुजःपिं संस्थायात बल्लाकेगु निंतिं अनवरत रुपं खटे जुयाच्वन ।
ने.सं ११२४ य् ३५ म्हेसिया पुचलं सुरुइ भचा भचा निक्षेप संलकन यानाः चिचिधंगु त्यासा बीगु यायां अन्तय् छगू सहमति यासें शान्ति सहकारी संस्था चायेकाः थुगु खलःयात दिगो व बल्लाकेत ताःलात । शान्ति खलःया श्रोत धयागु हे दुजः, आजिवन दुजः व संरक्षक जुयाच्वंपिंसं बियाच्वंगु तिबः हे खः ।
वय्कःपिनि पाखें वइगु सदस्य शुल्क व ग्वाहालि पाखें वइगु ध्यबा मुंकाः व शान्ति सहकारी पाखें वइगु ब्याज व थीथी इलय् सहकारी पाखें वइगु ग्वाहालिया लिसें न्हू दुजःपिनि पाखें वइगु शुल्क व ग्वाहालिं आःतक थ्व खलः न्ह्यानाच्वंगु दु । थ्व ज्याया निंतिं थुगु संस्थाय् च्वनाच्वनादीपिं सकलें नेवाः जातिया तःधंगु ल्हाः दु ।
लक्ष्य व उद्देश्य
थिमि पाखें येँय वयाः व्यापार व्यवसाय यानाच्वंपिं, शिक्षाया निंतिं वयाच्वंपिं जागीर नयाच्वंपिं सकसितं छथाय् तयाः थःथःय् ग्वाहालि यायगु सन्देश मार्फत सुख व दुःखय् साथ बीगु, सद्भाव तयेगु व समृद्धिपाखे न्ह्याः वनेगु थ्व संस्थाया लक्ष्य खः । थ्व लक्ष्य नाराय् जक सीमित मखु, आवश्यक जुल धाःसा माःगु कथंया ग्वाहालि यायेत संस्थाया दुजःपिं सकलें तयार दु ।
थ्व संस्थाया स.स्थापकत, संरक्षकत व सल्हाकारत लिसें संस्थाप्रति इमान्दार व्यक्तिपिंत इलय् ब्यलय् थीथी ज्याझ्वः यानाः अभिनन्दन यायेगु ज्या जुया वयाच्वंगु दु । अथेहे शान्ति खलःया विकास व पुनरागमनयात ध्यानय् तयाः थुगु समितिया अध्यक्ष व सकलें कार्यसमिति दुजः छप्पँ जुयाः दछियंकं थीथी ज्याझ्वः न्ह्या वयाच्वंगु दु ।
गथेकि ससुपुजा, स्वास्थ्य शिविर, एसईई सम्मान । दछियंकं थज्याःगु थीथी ज्याझ्वः यानाः संस्थाया दुजःपिंत प्रोत्साहन बीगु याना वयाच्वंगु दु । संस्थाया मू भावना सद्भाव, ग्वाहालि व समृद्धि खः । थ्व शान्ति खलःया छगू जक मूल मन्त्र, लक्ष्य व सफलता खः । थुकियात आत्मसात यानाः संस्थायात न्ह्याकेगु निंतिं संस्थाया पदाधिकारीत जक मखु पुलांपिं, न्हूपिं दुजः, संस्थापक, संरक्षक सकलें छप्पँ जुयाः लगे जुयाच्वंगु दु ।
खलःया थ्व अभियानयात छुं नं कथंया राजनीतिया रंग मबिसें विशुद्ध तन, मन व धनं ग्वाहालि याना वनेमाः । थ्व अभियानय् सकलें नेवाःतय् मू भूमिका दइ ।
सुन्दरमान श्रेष्ठ (बागमति भाई)
संरक्षक÷उपाध्यक्ष, शान्ति खलः
LEAVE YOUR COMMENTS