लानिपुखूया कंक्रिट चीकल

येँ – लानिपुखू दयेकेगु निंतिं यंकातःगु कंक्रिट, डण्डीत चीके सिधःगु खँ धाःगु दु । पुरातात्विक महत्व दुगु लानिपुखू परम्परागत निर्माण सामग्री छ्यलाः दयेकीगु जुइवं न्हापा पुनःनिर्माणया निंतिं धकाः हयातःगु आधुनिक निर्माण सामाग्री चीकूगु खः । लानिपुखुली कंक्रिट छ्यलाः दयेकाच्वन धकाः प्यखेरं विरोध जुइवं आः परम्परागत निर्माण सामग्री हे छ्यलाः दयेकेत्यंगु खः ।

झिंच्याला न्ह्यः लानिपुखू दयेकेगु धकाः आधुनिक निर्माण सामग्री तयेहःगु खः । स्थानीय निकायया चुनाव लिपा दयेकूगु विज्ञ समूहया सुझाव कथं आः पुलांगु हे सामग्री छ्यलाः लानिपुखू पुनर्निर्माण याइगु जूगु दु । येँ मनपाया इन्जिनियर राम थापां आः वइगु साउन निसें हे पुनःनिर्माण ज्या सुरु जूगु खँ धयादीगु दु ।

वय्कलं धयादीगु दु, ‘वइगु आर्थिक दँया सुरुइ हे ज्या न्ह्याकेगु जुइ । सकसियां लिसे सहलह जुइधुंकूगुलिं आः सुनां ज्याय् पंगः थनेगु वा विरोध याइ मखु जुइ । उकिं क्वःछिनातःगु इलय् हे ज्या सिधइ ।’पुरातत्व विभागं सहमति मवःनिगुलिं आः ज्या दिकातःगु खः । येँ मनपां थ्वयां न्ह्यः जेठ १७ गते निसें पुनःनिर्माण यायेगु खँ धाःगु खः ।

आः विभागं सहमति वयेवं ज्या सुरु जुइगु खँ धाःगु दु । लानिपुखूया दथुइ च्वंगु बालगोपालेश्वर देगः नं तःभुखाचं क्षति जूगु खः । येँ मनपां दयेकूगु विज्ञ समूहं उगु देगः नं प्रताप मल्लकालीन शैलीं हे दयेकूसां जिउगु सुझाव बिउगु खः ।