बेल्जियम–फ्रान्स बराबरीया टक्कर

रसियाय् जुयाच्वंगु विश्वकपया सेमिफाइनल कासा थनिंनिसें सुरु जुइत्यंगु दु । थौं फ्रान्सं बेल्जियमलिसे न्हापांगु सेमिफाइनल म्हितीसा कन्हय् इंग्ल्यान्ड व क्रोसिया दथुइ कासा जुइ । फ्रान्स व बेल्जियम दथुइ आतक ७३ क्वः धेंधेंबल्लाः जुइधुंकूगु दु । गुकी बेल्जियम ३० क्वः त्याःगु दुसा फ्रान्स २४ क्वः त्याःगु दु । मेगु १९ गू कासा बराबरीइ क्वचाःगु खः ।

बेल्जियम ३२ दँ लिपा विश्वकपया सेमिफाइनलय् थ्यनाच्वंगु दु । सन् १९८६ य् सेमिफाइनलय् थ्यंबलय् अर्जेन्टिनापाखें बूगु खः । बेल्जियमं आःतक विश्वकपया फाइनल म्हितेखंगु मदुनि । उकिं थ्व पालय् न्हापांखुसी फाइनल म्हितेगु निंतिं फ्रान्सयात बुकेत थ्व टिमं भरपूर कुतः याइगु जुइ ।

मेखे फ्रान्सं धाःसा १९९८ य् छक्व विश्वकप त्याके धुंकूगु दुसा सन् २००६ या फाइनल तक थ्यंगु खः । सेमिफाइनलय् धाःसा थ्व न्हापां खुक्वःखुसी थ्यनेधुंकूगु दु । उरुग्वेयात बुकाः वःगु फ्रेञ्चे टिम व ब्राजिलयात बुकाः वःगु बेल्जियमया टिमय् थुगु विश्वकपय् सन्तुलित टिम कथं न्ह्यःने वःगु दु ।

फ्रान्स ल्याय्म्ह कासामिपिंसं जाःगु टिम खःसा बेल्जियमया आःया टिमयात स्वर्णिम पुस्ता धयातःगु दु । बेल्जियमया टिमं थःपिंत नालाः तकःकथं स्वर्णिम कासा म्हिताः थुगु विश्वकपय् दकलय् अप्वः गोल याःगु टिम जुयाच्वंगु दु । स्ट्राइकर रोमेलु लुकाकु व इडेन हजार्ड बेल्जियमया निंतिं गुगुं नं इलय् गोल यायेत सक्षम कासामि खः ।

मेखे फ्रान्सया निंतिं एन्टोनिया ग्रिजम्यान व केलियन एम्बाप्पें सेमिफाइनल तक थ्यंकेत मू भूमिका म्हितूगु दु । बेल्जियमया मिडफिल्डर केभिन डि ब्रायन छम्ह उत्कृष्ट मिडफिल्डर खःसा ब्राजिल विरुद्ध वं उत्कृष्ट प्रदर्शन यासें गोल याःगु खः ।

केभिनयात पनेगु निंतिं फ्रान्सया मू मिडफिल्डर एन्जेलो कान्टो न्ह्यःने वइगु जुइ । थौं म्हितीगु निगुलिं टिमया गोलकिपर नं उत्कृष्ट फर्मय् दु । उकिं थौंया सेमिफाइनलय् तसकं प्रतिस्पर्धात्मक जुइगु अनुमान यायेफु ।