येँया व्यापारीतय्सं पसः चायेकल, प्रजिअतय् मुँज्यां लकडाउन छ्वासुकेत सिफारिस

येँ – येँया व्यवापारीतय्सं थनिंनिसें पसः चायेकूगु दु । नेपाल राष्ट्रिय व्यवसायी महासंघं बिहीवाःनिसें फुक्क कथंया पसः सुथय् ११ बजे तक चायेकेगु निर्णय याःगु खः । वहे कथं थौं येँया न्हूसतक, वंघः, असं, भोटाहिति, न्हू बानेश्वर, कोटेश्वर, बौद्ध, जोरपाटी लगायतया थासय् पसः चायेकूगु खः ।

लकडाउन ताःहाक जुयाः थःपिनिगु व्यवसाय बन्द जुइगु अवस्था वःगु धासें व्यवसायीतय्सं पसः चायेकेगु निर्णय याःगु खः । सरकारं नं व्यवसायीतय्त कर पुलेत इनाप यायेवं व्यवसाय संचालन बिना कर पुलेगु सम्भावना मदुगु धासें व्यापारीतय्सं पसः चायेकूगु खः । राज्ययात कर, छेँबहाः, बैंकया ब्याज नापं कर्मचारीतय्त तलब बीमाःगुलिं थःपिं बाध्य जुया पसः चायेकेमाःगु खँ व्यापारीतय्सं धाःगु दु ।

थ्वहे दथुइ पसः चायेकाच्वंगु गुलिखे थासय् प्रहरी वयाः पसः बन्द यायेत इनाप याः वःगु खः । उखे व्यवसायीतय्सं पसः चायेकेगु शुरु यायेवं स्वनिगःया प्रमुख जिल्ला अधिकारीतय् आकस्मिक मुँज्या च्वंगु दु । मुँज्यां क्राइसिस म्यानेजमेन्ट सेन्टर (सीसीएमसी) व उच्चस्तरीय समितियात लकडाउन छ्वासुकेत सिफारिस याःगु दु । मुँज्यां ब्वनेकुथी, सिनेमा हल, पार्टी प्यालेस लगायतयात पूर्णरुपं बन्द यानाः मेमेगू अत्यावश्यक ज्याखँया व्यवसाय चायेकेगु कथं लकडाउनया स्वरुप हिलेत इनाप याःगु खः ।

सम्बन्धित बुखँ

LEAVE YOUR COMMENTS