ल्हातं च्वयातःगु सफू संरक्षण यायेगु तालिम

येँ – ल्हातं च्वयातःगु पाण्डुलिपि व ताडपत्र संरक्षण यायेगु तालिम म्हिगः निसें न्ह्याःगु दु । युनिभर्सिटी अफ ह्याम्बर्ग जर्मनी, हिल म्युजियम म्यानुस्क्रिप अमेरिका व आशा सफूकुथिया मंकाः ग्वसालय् म्हिगः ज्याझ्वःया उलेज्यानिसें हे तालिम बीगु ज्या नं न्ह्याःगु खः ।

थ्व वालय् निन्हु व मेगु वालय् स्वन्हु यानाः मुक्कं न्यान्हु न्ह्याइगु उगु तालिमया झ्वलय् म्हिगः हे ह्याम्वर्ग युनिर्भसिटीया प्राध्यापक मय्जु मिखायल बिडलं किलं नःगु, ध्वगीगु, स्यनाच्वंगु ल्हातं च्वयातःगु पाण्डु लिपि गुकथं भिंकेगु व उकियात गुकथं संरक्षण यायेगु धइगु बारे तालिम बियादीगु खः ।

लिसें वय्कलं अज्याःगु पाण्डुलिपि वा हस्तलिखित ग्रन्थ गुकथं भ्वंया बाकसय् सुरक्षित रुपं तयेगु धकाः स्यनादीगु खः । तालिम बीगु झ्वलय् किलं मनइकथं भ्वंया बाकस गुकथं दयेकेगु धइगु तालिम बिसें हलिमय् जुयाच्वंगु हस्तलिखित ग्रन्थ संरक्षण बारे थःगु अनुभव नं वय्कलं कनादीगु दु ।

तालिम ज्याझ्वलय् केशर पुस्तकालयया प्रतिनिधि, राष्ट्रिय अभिलेखालयया प्रतिनिधि व थीथी न्हय्गू संस्थां ब्वति काःगु खँ आशा सफूकुथि पुस्तकालयाध्यक्ष शरद कसां नेपालभाषा टाइम्सयात कनादीगु दु ।

तालिम धुंकाः न्हापांगु ब्व कथं आशा सफूकुथिइ दुगु सफूया संरक्षण यायेगु व वयां लिपा डिजिटाइज यायेगु खँ धाःगु दु । संस्कृतिविद् काशीनाथ तमोटं लसकुस यानाः न्ह्याःगु उलेज्या ज्याझ्वलय् उगु तालिम परियोजना हयेगु निंतिं भूमिका म्हितादीम्ह डा. विदुर भट्टराई नं उपस्थिति जुयादीगु खः ।