येँ मनपाय् राहत समन्वय ज्या वडामार्फत जुइगु

येँ (रासस) – येँ महानगरपालिकां कोरोना संक्रमण, नियन्त्रण व रोकथामयालिसें प्रभावितयात राहत व ग्वाहालि बीगु कार्यक्रम वडाअध्यक्ष व वडा समितिया नेतृत्वय् जुइगु खँ धाःगु दु ।

म्हिगः जिल्ला प्रशासन कार्यालय येँपाखें ग्वसाः ग्वःगु भाइरस संक्रमण व्यवस्थापन नियन्त्रण, राहत तथा सहयोगया निंतिं एकीकृत व समन्वयात्मक योजना विषयय् जूगु सहलहय् येँ महानगरपालिकाया मेयर विद्या सुन्दर शाक्यं थ्व खँ धयादीगु खः । थ्वहे झ्वलय् वय्कलं नगरय् च्वंपिं सुं नं नये मखंक च्वनेम्वालेमा धकाः वडा मार्फत बेरोजगारया तथ्यांक गुलि फु उलि याकनं हयेत निर्देशन नं बियादीगु दु ।

वय्कलं धयादीगु दु, ‘कोरोना संक्रमण रोकथाम, राहत व सहयोग वितरणया ज्या फुक्कं वडाअध्यक्ष व वडा समितिया नेतृत्वय् छगू हेलुखां यायेगु हे दकलय् प्रभावकारी उपाय खः ।’

प्रदेश सभा सदस्य, प्रमुख जिल्ला अधिकारी जनकराज दाहाल व सुरक्षा अधिकारीसहित जूगु सहलहय् मेयर शाक्यं क्वारेन्टाइनया भौतिक पूर्वाधार महानगरं तयार यायेगु, तर थःपिंके गाक्क स्वास्थ्य जनशक्ति मदुगुलिं संघ सरकारयाके जनशक्ति उपलब्ध यानाबीत नं इनाप यानादीगु खः ।

सहलहय् सिडिओ दाहालं ग्वाहालिया निंतिं थीथी संघसंस्थातय्सं जिल्ला प्रशासन कार्यालयय् स्वापू तःवःगु धासें थःपिंसं उमित वडा कार्यालयलिसे समन्वय याकाबीगु खँ धयादीगु खः । वय्कलं हे वडापाखें हे एकद्वार प्रणालीकथं वितरण प्रणाली दयेकेमाःगु खँ धयादीगु खः ।

कामपां थ्वयां न्ह्यव हे ३२ गुलिं वडाय् परिपत्र यासें वडाय् च्वंगु खाद्य सामानया पसः नियमित चायेके बीगु, फयांफतले छेँछेँय् हे सामान आपूर्ति याकेगु निंतिं प्रहरीया समते ग्वाहालि कयाः सहजीकरण यायेगु खँ न्ह्यथनातःगु दु । अथेहे छगू वडाय् खुला न्ह्यव निसेंच्वनाच्वंपिं श्रमिक ज्यामितय् विवरण संकलन यायेगु खँ नं न्ह्यथनातःगु दु । दैनिक ज्यालादारी, मजदुरी यानाच्वंपिं, सतकय् च्वनाच्वंपिं छेँ मदुपिं मनूतय्त लक्षित यानाः आवश्यउक राहत ग्वाहालि यायेगु खँ नं परिपत्रय् न्ह्यथनातःगु दु ।

ने.सं. ११४० चौलाथ्व ५ (चैत १६)