प्रदेश ३ य् हानं राजधानी विवाद मुख्यमन्त्री–मन्त्री दथुइ मतभेद

येँ – प्रदेशया स्थायी राजधानी गन तयेगु धइगु खँयात कयाः ३ नम्बर प्रदेशया मुख्यमन्त्री डोरमणि पौडेल व आन्तरिक मामिला तथा कानुनमन्त्री शालिकराम जम्मरकट्टेल दथुइ विवाद ब्वलंगु दु । मुख्यमन्त्री पौडेलं हेटौंडाय् हे प्रदेशया राजधानी तयेमाः धकाः अडान कयाच्वंगु दुसा कानुन मन्त्री जम्मरकट्टेलं काभ्रेयात राजधानी दयेकेमाः धकाः न्ववायेगु यानाच्वंगु दु ।

पौडेलं हेटौडाय् हे राजधानी तयेमाः धकाः बः बीगु जक मखुसें उकिया निंतिं केन्द्रीय नेतातय् दथुइ लबिङ नं यानाच्वंगु दु । विशेष यानाः नेपाल कम्युनिष्ट पार्टीया छम्ह अध्यक्ष पुष्पकमल दाहालयात कन्भिन्स यायेगु व मेम्ह अध्यक्ष लिसें प्रधानमन्त्री केपी शर्मा ओलीयात थःगु पक्षय् निर्णय याकेत स्वयाच्वंगु दु । अध्यक्ष दाहालं नं चितवन वा हेटौंडाय् राजधानी तयेमाः धायेगु यानाच्वंम्ह खः ।

तर जम्मरकट्टेल लगायत प्रदेशया आपालं सांसदत धाःसा हेटौडाय् राजधानी तयेगु पक्षय् मदु । निगू तिहाइ स्वयां अप्वः सांसदत काभ्रेय् राजधानी तयेमाःगु अडानय् दुगुलिं राजधानीया बारे निर्णय यायेगु ज्याय् नं मुख्यमन्त्री पौडेलं अलमल यानाच्वंगु खँ नेकपाया सांसदतय्सं धायेगु यानाच्वंगु दु ।

हेटौंडाय् राजधानी तयेगु खःसा चितवन व मकवानपुरयात जक पायक जूगुलिं मेपिं सांसदतय्सं उकियात स्वीकार याये मफइगु खँ धायेगु यानाच्वंगु दु । प्रदेशय् झिंस्वंगू जिल्ला दुगु व निगू जिल्लायात पायक जुयाः झिंछगू जिल्लाया सांसदतय्त अपायक जुइ कथं राजधानी तये मजिउगु खँ सांसदतय्सं धयाच्वंगु दु ।

हेटौंडाय् राजधानी तल धाःसा नीछम्ह सांसदतय्त पायक जुइगु व मेपिं चय्च्याम्ह सांसदतय्त अपायक जुइगु जक मखु प्रदेशया जनतां बिउगु मतया हे अवहेलना जुइगु तर्क नं काभ्रेय् राजधानी तयेमाः धाइपिं सांसदतय्सं तयेगु यानाच्वंगु दु । झिंछगू जिल्लायात अःपुगु थाय् काभ्रे जूगुलिं सांसदतय्सं काभ्रेय् राजधानी तयेमाः धयाच्वंगु खः । सांसदतय् कथं रामेछाप, सिन्धुली, दोलखा, सिन्धुपाल्चोक व काभ्रे थवंथवय् सती । अथे हे येँ, यल व ख्वपया निंतिं नं काभ्रे हे सती । नुवाकोट, धादिङ व रसुवाया सांसदतय्त नं हेटौंडा वनेगु स्वयां काभ्रे सतीगु जूगुलिं हेटौंडायात राजधानी दयेके मजिउ धइगु उमिगु तर्क जुयाच्वंगु दु ।

लुमंकेबहः जू, प्रदेशया स्थायी राजधानी गन तयेगु खँय् विवाद जुयाः हे मुख्यमन्त्री डोरमणि पौडेल व पुलांम्ह पूर्वाधार मन्त्री केशव स्थापित दथुइ तच्वःगु विवाद ब्वलंगु खः उकिया लिच्वः कथं मुख्यमन्त्री पौडेलं मन्त्री स्थापितयात बर्खास्त हे यानादिल ।

सम्बन्धित बुखँ

LEAVE YOUR COMMENTS