येँया मेयर विद्यासुन्दर शाक्ययात नं कोरोना

येँ- येँ महानगरपालिकाया मेयर भाजु विद्यासुन्दर शाक्ययात कोरोना पुष्टि जूगु दु । वयकःयात ल्वयया छुं संकेत धाःसा खने मदुनि । येँया ग्राण्डी अस्पतालय् यानास्वःगु वयकःया स्वाब परीक्षणय् पोजिटिभ खने दुगु रिपोर्ट थौं वःगु खः । वयकलं म्हिगः स्वाब परीक्षण यानादीगु खःसा परीक्षण लिपा वयकः छेँनं पिहां मझासे च्वनादीगु खः ।

मेयर शाक्य आः येँया लगमय् च्वंगु थःगु हे छेँय् होम–क्वारेन्टाइनय् च्वनादीगु दु । वय्कः थः जहान मयजु सुचिता शाक्यया स्वास्थ्य परीक्षण यायेत ग्राण्डी अस्पताल झाःगु खःसा अन हे निम्हेसियां स्वाब परीक्षण जूगु खः । वयकःया जहान शाक्यया रिपोर्ट धाःसा नेगेटिभ वःगु दु । मेयर शाक्यं थःगु प्रत्यक्ष सम्पर्कय् वःपिं मेपिंत नं सतर्क जुइत व परीक्षण यायेत इनाप यानादीगु दु ।

लिपांगु इलय् मेयर शाक्य कोरोना संक्रमितत च्वनेगु लागिं क्वारेन्टाइन दयेकेगु ज्याय् व्यस्त जुयादीगु खःसा प्यन्हु न्ह्यः तिनि वयकः लानिपुखू व धरहरा पुनर्निर्माणया निरीक्षण यायेत शहरी विकास राज्यमन्त्री रामवीर मानन्धर लगायत मेपिंपदाधिकारीतलिसें उखे झाःगु खः ।