न्यूयोर्क यक्व हे हिलेधुंकल : सबिता श्रेष्ठ, नर्स

न्यूयोर्कया लङगङ अस्पतालय् नर्सया रुपय् ज्या यानादीम्ह मयजु सबिता श्रेष्ठं कोरोना संक्रमणया इलय् फ्रन्ट लाइनय् च्वनाः विरामीया सेवा यानादीगु खः । गायनय् नं रुची दुम्ह मयजु श्रेष्ठलिसे न्यूयोर्कय् ब्वलंगु कोरोना भाइरसय् केन्द्रित जुसें नेपालभाषा टाइम्स डट कमया ‘अमेरिकाय् नेवाः’ ज्याझ्वःपाखें भाजु प्रविण ताम्राकारं कयादीगु बःचाहाकःगु अन्तर्वार्ता :

न्यूयोर्क ला कोभिड-१९ या इपिसेन्टर हे जुयाच्वंगु खः । आः अनया अवस्था गय् च्वं ?
० आः यक्व हे सुधार जुइधुंकल । अस्पतालय् विरामी वयेगु क्रम ७५ प्रतिशत ति हे कम जुइधुंकल धाःसां जिउ । स्वला न्ह्यः तक थ्व अस्पताल छगुलिं हे आईसीयु थें दयेकाः ज्या यानागु खः । आः मुक्कं नितँजाः जक विरामी दु । कोरोना विरामीत अप्वः यानाः छेँय् हे च्वनाः वासः यानाच्वंगु कारणं नं अस्पतालय् चाप कम जूगु खः । अथे खःसां अस्पतालतय्सं सामान्य विरामीयात धाःसा अझ नं भर्ना मकाःनि । आः कोरोना विरामी वयेसातकि तप्यंक भेन्टिलेटरय् तयाः वासः याके फइगु अवस्था दु । आः ‘ड्रास्टिक चेन्ज’ हे वल धाःसां जिउ ।

विरामी यक्व दुगु इलय् छिकपिं डाक्टर–नर्सतयत गुलित थाकुल ?
० था ला तसकं थाकुल । स्वला न्ह्यवंनिसें जिमिसं आः तक क्वथाय् पासापिंत थियागु तकं मदुनि । जिमि मांबाःपिं नेपालय् दु । हरेक २–२ घन्टाय् चिउताः कयाः फोन यानाच्वनी । विरामीतयत म्हाः मधासे सेवा यायेमाली । जिमित ला ‘वार जोन’ य् वनाः ज्या याये थें का । गुलि ला जिमि नर्स पासापिंत हे कोरोना जूगु दु । जिमित अबले वास्तवय् थःत कोरोना पुनी धइगु सिबें नं जिपिंपाखें मेपिंत पुनी धकाः तसकं चिन्ता जुइगु । जिपिं खनाः मनूत नं तसकं ग्याः । नर्सया ड्रेस पुनाः पिहां वंसा मनूत तापाकंनिसें हे बिसिउँ वनीगु । गुलिसिनं ला जिमित ड्रेस पुनाः पिहां वये मते धकाः सुझाव नं बियाहल । ट्रेनय् वंसा स्वास्थ्यकर्मी बाहेक सुं हे दइ मखु । खाली । सुनसान ।

अबले ला कोरोनां कयाः मनूत नं यक्व सित, व खनाः छितः गथे ताल ?
० जि थन स्वास्थ्यसेवाय् वयागु स्वदँ दत । उकिं जिं अपायच्वः सीपिं मनूत मखनानि । तर थ्व कोरोनाया कारणं थुलि मनूत सित कि जि ला तसकं ग्यात । थन अस्पतालय् ला बेड मदयाः अस्पतालया पिने फ्लोरय् तकं लाशया लाश तया तये माःगु अवस्था जुल । तसकं विभत्स अवस्था जुल व ला । आः लुमनीबलय् नं ग्यासें वः ।

थौंकन्हय् न्यूयोर्कया सामाजिक अवस्था गथे च्वं ?
० न्यूयोर्क आः न्हापाया शहर मखयेधुंकल । शहरय् न्हापा थेंज्याःगु भीड मजूनि । अथे खःसां स्वला न्ह्यः सिबें मनूत पिहां वयेगु शुरु जूगु दु । बस ट्रेनय् स्थानीय मनूत नं च्वना वःगु खने दया वःगु दु । पसःत ला अप्वः बन्द हे दनि । अथे खःसां रेष्टुरेन्ट वंसा नयेगु धाःसा दु । अयनं पिहां वयेबलय् मास्क व पन्जा अनिवार्य यानातःगु दु । मास्क मदुसा थःगु गलबन्दी वा स्कार्फं जूसां न्हाय् व म्हुतु त्वपुनाः जक जुइमाः धयातःगु दु । ग्लोसरी पसलय् नं पन्जा न्ह्यानाः जक दुकायेके बी । न्ह्यागुसां भचा बांलाना वःगु दु ।

अनया नेपाःमितय् अवस्था छु दु ?
० समस्या ला नेपाःमितयत नं जूगु दु । दकलय् तःधंगु समस्या ला यक्वसिया रोजगारी गुमे जूगु दु । रोगं कयाः नं यक्व नेपाःमित सीगु दु । थुकिं पिहां वयेत भचा ई काइ तिनि जुइ ।

छिं स्वयेबलय् कोरोनाया थ्व महामारी गबले तक समाप्त जुइ थें च्वं ?
० थ्व ला धाये फइ मखु । आः तक भ्याक्सिन वःगु मदुनि । वासः वयेत मेगु दछि ला ई काइतिनि हे जुइ । तर मनूत आः यक्व सचेत जुइधुंकूगुलिं रोग जूसां मेन्टेन यानाः धाःसा च्वने फइ । थ्व वर्षया अन्तिम ला झीसं मेन्टेन यानाः हे च्वने माली ।

अथे मेन्टेन यायेगु उपाय छु दु ?
० थुकी झी नेपाःया नसात्वँसा हे बांलाःगु उपाय खः । इम्युनिटी शक्ति बढे यायेगु नसात्वँसा भचा अप्वः नयेगु याये माली । बहनी द्यने न्ह्यः हलू, पालु, कागती व कस्ती दुगु क्वाःलः त्वनेगु यात धाःसा उकिं यक्व हे फाइदा याइ ।