वायु प्रदुषण पनेत स्वनिगःया मेयरपिं छप्पँ
येँ – स्वनिगःया नगरपालिकातय् प्रमुखपिंसं वायु प्रदूषण नियन्त्रण यायेगु निंतिं मंकाः सहकार्य यायेगु प्रतिवद्धता प्वंकूगु दु । वायु प्रदूषण नियन्त्रण सम्बन्धी म्हिगः ग्वसाः ग्वःगु महानगरपालिका व नगरपालिकाया नगरप्रमुखपिनिगु सम्मेलनय् वय्कःपिंसं उगु प्रतिवद्धता प्वंकूगु खः ।
ज्याझ्वलय् न्ववायेगु झ्वलय् यँे महानगरपालिकाया प्रमुख विद्यासुन्दर शाक्यं स्वच्छ वातावरण कायम यायेत संघ, प्रदेश व स्थानीय तहया सरकार दथुइ प्रभावकारी समन्वय माःगु खँ कुलादिल । अथेहे यल महानगरपालिकाया प्रमुख चिरिबाबु महर्जनं स्वनिगःया वायु प्रदूषण दकलय् तःधंगु समस्याया रुपय् दु धासें समाधानया निंतिं स्थानीय तहया कुतलं जक प्रभावकारी भूमिका म्हिते मफइगु खँ कनादिल ।
इसिमोडं ग्वसाः ग्वःगु उगु ज्याझ्वलय् इसिमोडया महानिर्देशक डेभिड मोल्डेनं हिमाली देय्या वातावरण क्षेत्रय् ज्या यानाच्वनागु खँ कनादिसें वायु प्रदुषण नियन्त्रण सम्बन्धय् माःगु ग्वाहालि यायेगु प्रतिवद्धता प्वंकादिल ।
ज्याझ्वलय् गोकर्णेश्वर, सूर्य विनायक, नागार्जुन, मध्यपुर थिमि, महालक्ष्मी, बुढानिलकण्ठ नगरपालिकाया प्रमुखपिंसं स्वनिगःया पूर्वाधार विकास, वायु प्रदूषण नियन्त्रण व हरियाली प्रवद्र्धनय् समन्वय व सहकार्य यायेमाःगु खँय् बः बियादीगु खः । ज्याझ्वलय् वःगु थीथी विषययात थप सहलह यानाः मंकाः प्रतिवद्धता घोषणा यायेगु खँ धाःगु दु । सम्मेलनय् स्वनिगःया महानगरपालिका व नगरपालिकाया प्रमुख व उपप्रमुखपिनि उपस्थिति दुगु खः ।
LEAVE YOUR COMMENTS