गृहमन्त्रीयात नेवाःतय् ज्ञापनपौ
येँ (नेपालभाषा टाइम्स)÷येँया सीडीओ कार्यालयं नेवाः नां तयाः संस्था दर्ता याके मबिउगु खँयात कयाः म्हिगः नेवाः देय् दबूपाखें उपप्रधान लिसें गृहमन्त्री रवि लामिछानेयात नापलानाः ज्ञापनपौ लःल्हात ।
वंगु छुं ई न्ह्यः येँया निगू संस्थातय्सं परम्परागत नेवाः नां तयाः संस्था दर्ता याः वंबलय् येँया सीडीओ कार्यालयं नेवाः नांयात खस नेपाली भासं अनुवाद यानाः तःसा जक दर्ता यायेगु जुइ धासें अथें लित छ्वया हःगु खः । थुकिया हे विरुद्ध नेवाः देय् दबूया पहलय् म्हिगः गृहमन्त्रीयात नापलानाः ज्ञापनपौ बीगु ज्या जूगु खः ।
ज्ञापनपौ लःल्हाना कासें गृहमन्त्री लामिछानें थम्हं थुकिया बारे सीडीओ लिसे खँ ल्हानाः लिपा हानं समस्या मवइ कथं समाधानया लँपु मालेगु बचं बियादिल । देशय् लोकतन्त्र वःसां प्रशासनय् उकियात कार्यान्वयन याये हे ल्यं दनि धासें वय्कलं थुकिया लागिं माःगु ज्या याये धयादीगु खः ।
नेवाः देय् दबूया नायः पवित्र वज्राचार्यया नेतृत्वय् वंगु उगु पुचलय् बागमती प्रदेशया सांसद शैलेन्द्र वज्राचार्य, दर्ता याके मबिउगु संस्थाया पदाधिकारीपिं मनरत्न शाक्य, सूर्यनारायण महर्जन, अभियन्ता गणपतिलाल श्रेष्ठ लिसें मेपिं नं नेवाः कार्यकर्तापिनि उपस्थिति दुगु खः ।
नेवाः नां तयाः संस्था दर्ता याके मबीगु ज्या यलया सीडीओ कार्यालयय् नं जूगु खँ सीदुगु दु ।
LEAVE YOUR COMMENTS