नेकपा स्थायी कमिटी मुँज्या हानं स्थगित

येँ – मंगलवाः स्वनिगः दुने स्वम्ह कोरोनाया संक्रमण खनेदयेवं नेपाल कम्युनिष्ट पार्टी (नेकपा)या स्थायी कमिटी मुँज्या हानं स्थगित याःगु दु ।

थौं सुथय् ११ बजे पार्टी ज्याकू धुम्बाराहीलय् च्वनेगु धकाः क्वःछिनातःगु मुँज्या स्थागित जूगु जानकारी स्थायी कमिटी दुजतय्त याकूगु दु । स्वनिगः दुने नं कोरोनाया संक्रमण अप्वःगुलिं मुँज्या स्थगित यायेमाःगु खँ धाःगु दु ।

अथेहे स्थायी कमिटीया दुजतय्त याःगु कोरोनाया परीक्षणया लिच्वः नं मवःनीगु व नेता भीम रावलया सुरक्षागार्डयात नं कोरोना संक्रमण जूगुलिं आःयात मुँज्या स्थगित याःगु खः ।