‘नेपालं पियाच्वनेफइमखु, भारत तत्काल वार्ताया निंतिं तयार जुइमाः’
येँ – परराष्ट्रमन्त्री प्रदीप ज्ञवालीं सीमा अतिक्रमणया सम्बन्धय् भारत तत्काल वार्ताया निंतिं तयार जुइमाःगु खँ धयादीगु दु ।
साेमवाः संसदया अन्तर्राष्ट्रिय सम्बन्ध समितिया मुँज्याय् न्ववानादिसें वय्कलं नेपालं कोरोना भाइरसाया महामारी नियन्त्रण जुइगु ई तक पीमफइगु धयादिल । भारतया विदेश मन्त्रालयया प्रवक्तां आइतवाः कोरोना संक्रमण अन्त्य लिपा वार्ता यायेगु खँ धयादीगु बारे जानकारी बियादिसें मन्त्री ज्ञवालीं नेपालं कोरोना नियन्त्रण जुइगु ई तक पियाच्वनेमफइगु स्पष्ट यानादिल ।
वय्कलं नेपाः व भारत दथुइ सचिव स्तरीय संयन्त्र दुगुलिं आःयात अनं वार्ता न्ह्याकेफइगु धयादिल । यदि उकीं समस्याया निकास बीमफुसा परराष्ट्रमन्त्री स्तरया वार्ता व उकीं नं मजूसा उच्च राजनीतिक वार्ता यायेत नेपाः तयार दुगु धयादिल ।
सीमा विवाद सम्बन्धय् चीननाप नं वार्ता जुइ
अन्तर्राष्ट्रिय सम्बन्ध समितिया मुँज्याय् परराष्ट्र मन्त्री ज्ञवालीं भारत नाप वार्ता यायेधुंकाः चीन नाप नं वार्ता जुइगु खँ धयादिल । वय्कलं न्हापा भारत नाप वार्ता यायेगु व वयां लिपा चीन नाप निगु विषयलय् वार्ता जुइगु धयादिल ।
‘नेपाः, भातर व चीन दथुइया त्रिदेशीय विन्दु क्वःछिउगु मदुनी । उकीया निंतिं चीननाप सहलह यायेमानी,’ मन्त्री ज्ञवाली धयादिल, ‘मेगू सहलह यायेमाःगु विषय धाइगु भारत व चीनं सन् २०१५य् याःगु सम्झौता खः ।’
तत्काल अन्तर्राष्ट्रियकरण जुइमखु
अथेहे मुँज्याय् मन्त्री ज्ञवालीं सीमा विवाद सम्बन्धय् तत्काल अन्तर्राष्ट्रियकरण मजुइगु स्पष्ट यानादिल । वय्कलं तत्काल थ्व विषययात अन्तर्राष्ट्रियकरण यायेगु पक्षय् सरकार मदुगु धयादिसें आःयात निगू पक्षीय वार्ताय् सरकार केन्द्रित जुइगु धयादिल । वय्कलं लिपा सीमा विवादया खँयात अन्तर्राष्ट्रियकरण यायेमाःगु अवस्था वःसा उवलय् अन्तर्राष्ट्रियकरण जुइगु नं धयादिल ।
सीमाय् सशस्त्र प्रहरीयात छ्वइगु
परराष्ट्रमन्त्री ज्ञवालीं भारतं अतिक्रमण याःगु लगायत सीमाय् सशस्त्र प्रहरीयात छ्वयेगु तयारी जुयाच्वंगु खँ धयादीगु दु । मुँज्याय् मन्त्री ज्ञवालीं भीआईपीया सुरक्षाय् खटेजुयाच्वंपिं सशस्त्र प्रहरीयात अनं चीकाः सीमाय् छ्वयेगु जानकारी बियादीगु खः । वय्कलं भीआईपीतय्त बियातःगु फुक्कं सशस्त्रयात सीमाय् छ्लीगु धयादिल ।
थ्वहे दथुइ भारतं अतिक्रमण याःगु लिपुलेक क्षेत्रय् छगु पुचः छ्वयेगु तयारी सशस्त्र प्रहरीं न्ह्याकूगु दु । सशस्त्रं २५म्ह निसें ३५म्हेसिया छगु पुचः दयेकाः उखे छ्वयेगु तयारी याःगु दु ।
LEAVE YOUR COMMENTS