‘संस्कृत ब्वंकेगु निर्णय असंवैधानिक’

येँ – नेपाल आदिवासी महासंघं सरकरं कक्षा १ निसें संस्कृति ब्वंकेगु धकाः याःगु निर्णय असंवैधानिक जूगु धासें विरोध प्वंकूगु दु ।

शिक्षा मन्त्रालय व उकीया अन्तर्गतया पाठ्यक्रम विकास केन्द्रं संस्कृति विषयात कक्षा १ निसें ऐच्छिक विषयया कथं ब्वंकेगु धइगु संविधानया व्यवस्था अःख जूगु खँ महासंघं धाःगु दु । महासंघया अध्यक्ष जगत बरामं छगू विज्ञप्ति पिथनादिसें सरकारया थुगु निर्णय प्रति आपत्ति प्वंकूगु दु ।

‘संविधानया व्यवस्था कथं माध्यामिक तहतक शिक्षा स्थानीय तहया सरकारया अधिकार क्षेत्र खः’, महासंघं विज्ञप्ति धाःगु दु, ‘पाठ्यक्रम विकास व मूल्यांकन परिषद्ं ल्ह्वंगु पलाः व याःगु ज्या असंवैधानिक जूगु महासंघया ठहर दु ।’

कोरोना भाइरसं यानाः नेपाःमित लकडाउनय् च्वनाच्वंगु इलय् विरोध मजुइमाः धकाः बद्नियत व षड्यन्त्रपूर्वक ढंगं सरकारं थ्व विभेदकारी पलाः ल्ह्वंगु खँ विज्ञप्तिइ न्ह्यथनातःगु दु । निर्णयपाखें एकल जातीय–नशलीय–भाषिक पक्षपोण यायेगु ज्या जूगु धासें महासंघं थुगु निर्णय लितकायेत नं इनाप याःगु दु ।

नापं महासंघं नेपालय् न्ववाइगु फुक्क रैथाने मांभाय्यात पाठ्यक्रम, पाठ्यपुस्तक तयार यानाः पठनपाठनया व्यवस्था मिले यायेत संघ, प्रदेश व स्थानीय तहया सरकारयात इनाप नं याःगु दु ।

शिक्षा, विज्ञान व प्रविधि मन्त्री गिरिराजमणि पोखरेलया अध्यक्षताय् वंगु माघ २ गते च्वंगु राष्ट्रिय पाठ्यक्रम विकास व मूल्यांकन परिषद्या मुँज्यां कक्षा १ निसें संस्कृत भाय्यात ऐच्छिक विषय कथं दुथ्याकेगु निर्णय याःगु खः ।

सम्बन्धित बुखँ

LEAVE YOUR COMMENTS