मातृभाषा पत्रकारिता दिवसया ज्याझ्वः स्थगित

यल – लकडाउनया कारणं थौं जुइमाःगु न्याक्वःगु मातृभाषा पत्रकारिता दिवसया फुक्क ज्याझ्वः स्थगित जूगु दु । न्हापांम्ह मातृभाषी पत्रकार धर्मादित्य धर्माचार्यया लुमन्तिइ वय्कःया बुन्हि कुन्हु लाकाः मातृभाषा पत्रकारिता दिवस न्यायेका वयाच्वंगु खः ।

मातृभाषा पत्रकारिता दिवस कुन्हु दँय्दसं नेवाः पत्रकार राष्ट्रिय दबूपाखें छगू ¥याली यासें धर्मादित्य धर्माचार्यया झ्वाताय् स्वांमाः क्वखायेकेगु लिसें मातृभाषा पत्रकारिता सम्मेलन याना वयाच्वंगु दु । धर्मादित्य धर्माचार्यं ने.सं. १०४५ (९५ दँ न्ह्यः) बुद्धजयन्ती कुन्हु निसें भारतया कलकत्तां ‘बुद्ध धम्म’ नांया पत्रिका पिथनादीगु खः । थ्वया निदँ लिपा थुगु पत्रिकायात ‘बुद्धधर्म व नेपालभाषा’ नामं पिथनेगु सुरु यानादीगु खः ।

अथेहे पत्रकार राष्ट्रिय दबू यल शाखां मातृभाषा पत्रकारिता दिवसया लसताय् बिया वयाच्वंगु धर्मादित्य पत्रकारिता पुरस्कार नं आःया निंतिं स्थगित याःगु दु । स्थगित जूगु पत्रकारिता सम्मेलन व धर्मादित्य पत्रकारिता पुरस्कार ई व अवस्था स्वयाः सार्वजनिक यायेगु खँ धाःगु दु ।