यलया सतक स्तरोन्नति याइगु

यल – यल महानगरपालिकां थःगु क्षेत्र दुने लाःगु सतक व दुनेया भागय् लाःगु सतकया स्तरोन्नति याइगु जूगु दु । यल महानगरपालिकां सतकया स्तरोन्नति यायेगु योजना न्ह्यःने हःगु खः । यल मनपां ४ मिटर स्वयां म्हो ब्या दुगु ३० किलोमीटर सतक स्तरोन्नति यायेगु नपं दुनेया लागाय् लाःगु सतकय् ल्वहंतं सीगु व अप्पा लानाः स्तरोन्नति यायेगु योजना दयेकूगु खः ।

सतकया स्तरोन्नति यायेगु योजनाय् लाःगु मध्ये प्यंगू किमीया सतकया स्तरोन्नति यायेगु ज्या सिधये धुंकूगु दुसा ल्यं दुगु थासय् नं योजनायात कार्यान्वयन याना यंकेगु तयारी जुयाच्वंगु दु । अथे हे दुनेया लागाय् लाःगु सतक कालोपत्र यायेगु स्वयां नं ल्वहंतं सीगु व अप्पा लायेगुयात प्राथमिकता बीगु योजना मनपां काःगु दु ।

यल मनपाय् दुनेया आपालं बस्तीइ चिब्यागु सतक लानाच्वंगु व गुलिखे सतक पर्यटकीय मार्गय् तकं लानाच्वंगुलिं स्थानीयवासी व पर्यटकतय् निंतिं सुविधायात ध्यानय् तयाः सतक स्तरोन्नतिया योजना न्ह्यःने हःगु खः ।

सतक स्तरोन्नतिया झ्वलय् आवश्यक थासय् धलान यायेगु योजना नं दुसा उकिया निंतिं बोलपत्र आव्हन यायेगु ज्यातकं जुइधुंकूगु मनपाया प्रवक्ता राजु महर्जनं कनादिल । स्तरोन्नति यायेबलय् पुलांगु संरचना मस्यनीकथं यायेगु मनपां न्ह्यथंगु दु ।