ने. सं. ११४४ ञलाथ्व दशमी -

अमेरिकी नेपाःमि भौतिकशास्त्रीतय् निक्वःगु सम्मेलन

येँ – अमेरिकाय् च्वनाच्वंपिं नेपाःमि मूलया भौतिक शास्त्रीतय् निक्वःगु एन्पा– सम्मेलन २०१९ जुल । अमेरिकाय् च्वनाच्वंपिं नेपाःमि मूलया भौतिक शास्त्रीतय् संगठन एशोसियसन अफ नेपाली फिजिक्स इन अमेरिका (एन्पा)या ग्वसालय् वंगु जुलाई १९ निसें २१ तक स्वन्हुयंकं उगु सम्मेलन जूगु खः ।

सम्मेलनय् अमेरिकानापं थीथी देय्या वैज्ञानिकतय् नं सहभागिता दुगु खः । सम्मेलनय् अमेरिका, नेपाः, क्यानाडा, स्वीट्जरल्याण्ड, दक्षिण कोरियाया न्यय्म्ह स्वयां अप्वः वैज्ञानिकतय्सं थःथःगु अनुसन्धान सम्बन्धी ज्यापौ नं न्ह्यब्वयादीगु खः । सम्मेलनय् प्रत्यक्ष रुपं उपस्थित जुयाः व ‘वेबएक्स’ प्रयोग यानाः अनलाइनया माध्यमं नं सहभागि जुइ फइगु व्यवस्था यानातःगु खः।

अनसाइट सम्मेलन न्यूयोर्कस्थित ब्रुकलिन कलेज जूगु खःसा सम्मेलनया प्रत्यक्ष प्रशारण वेबएक्स व फेसबुकपाखें नं याःगु खः । अमेरिकाया न्यूयोर्क, वेस्ट भर्जिनिया, पेन्सिलभेनिया, म्यासाचुसेट्स लगायतया राज्यं वःपिं भौतिकशास्त्रीतय्सं तकं थःथःगु शोधपत्र न्ह्यब्वःगु सम्मेलनया व्यवस्थापन ब्रुकलिन कलेजया भौतिक शास्त्र विभागया प्रमुख प्रोफेसर मिमलाल नकःमिं यानादीगु खः ।

न्यूयोर्क विश्वविद्यालयया डा. नरेश शाक्यं सहजकर्ताया भूमिका म्हितादीगु सम्मेलनया झ्वलय् न्यूयोर्कस्थित नेपाली महावाणिज्यदूत पुष्पराज भट्टराईं नेपाल सरकारं नकतिनि न्ह्याकूगु ‘ब्रेन गेन सेन्टर (बीसीजी)बारे विशेष जानकारी बियादीगु खः ।

ज्याझ्वलय् नवासें वय्कलं विदेशय् च्वनाच्वंपिं नेपाःमि विज्ञतय्सं थःपिंसं प्राप्त याःगु ज्ञान व सीपयात नेपाःया विकास व समृद्धिया निंतिं ग्वाहालि यायेगु ल्याखं सरकारीस्तरं बीसीजीया स्थापना याःगुलिं उकी आवद्ध जुइत नं इनाप यानादिल ।

सन् २०१८ य् स्थापना जूगु उगु संस्था भौतिक शास्त्रीतय्त संगठित यानाः थःपिनिगु दथुइ जूगु अध्ययन, अनुसन्धान व खोजया बारे अनुभव कालबिल यायेत, नेपालय् अनुसन्धानया निंतिं बौद्धिक मेमेगु स्रोत उपलब्ध याकेगु व नेपालं उच्च शिक्षाया निंतिं अमेरिका वइपिं नेपाःमि विद्यार्थीतय्त ग्वाहालि यायेगु उद्देश्य जूगु एन्पां जानकारी बिउगु दु ।