छाँयादेवी कम्प्लेक्स विरूद्ध संयुक्त राष्ट्र संघ व आईएलओया ध्यानाकर्षण

येँ – छाँयादेवी कम्प्लेक्स निर्माण यानाः थँबहलीया परम्परागत पुखू लगायत जग्गात मिचे याःगु धासें पुरातात्विक कमलपोखरी पुनस्थापना अभियानं नेपाःस्थित संयुक्त राष्ट्र संघ व आईएलओया ज्याकूया ध्यानाकषर्ण याकूगु दु ।

निगूलिं संस्थायात इमेला मार्फत छ्वःगु ध्यानाकर्षण पौलय् परम्परागत पुखुली कम्प्लेक्सया निर्माण लिपा अनया स्थानीय प्रधान समुदायतय् भूमि अधिकार नाप सांस्कृति अधिकार हनन् जूगु खँ धाःगु दु । केशर शम्शेरं पलेस्वां पुखुयात थःगु दरवारया लागा दुने लाका सुरु जूगु अतिक्रमण थौं अनधिकृत रुपं छाँयादेवी कम्प्लेक्स प्रा.लि.या ल्हातय् लाःवंगु खँ न्ह्यथंसें अभियानं नेपाःया सरकारयात स्थानीय समुदायया अधिकारयात संरक्षण व संवद्धृन यायेत दबाव बीत राष्ट्र संघ व आईएलओया ज्याकूयात इनाप याःगु दु ।

थँबहीया परम्परागत पुखूयात अतिक्रमण याःगु धासें सन् १९७० निसें अदालतय् मुद्दा जुयाच्वंगु दु । थुगु विषलय् आः नं सर्वच्च अदालतय् मुद्दा विचाराधीन अवस्थाय् दु । छाँयादेवी कम्प्लेक्सं अतिक्रमण यानाः संयुक्त राष्ट्र संघया आदिवासी सम्बन्धि घोषणा पत्र व आईएलओ १६९ न्ह्यथनातःगु स्थानीय समुदायया अधिकार हनन् जूगु खँ धाःगु दु ।

अभियानं स्थानीय समुदाययात अझ अप्व हानी जुइस्वयां न्ह्यः निगूलिं नियोगया अधिकारीतय्त स्थलगत अध्ययन यानाः आवश्यक पलाः ल्ह्वनेत नं इनाप याःगु दु ।