किसया भिडियो क्यनाः ब्ल्याकमेल

येँ – यलया छम्ह व्यवसायीयात चुप्पा नयाच्वनागु किपा सार्वजनिक याना बी धासें ब्ल्याक मेल याःम्ह छम्ह मिसा व वया मिजं पासायात प्रहरीं ज्वंगु दु । येँया सामाखुसिइ च्वंम्ह २५ दँया इन्दिरा उप्रेतिं फेसबुकपाखें पासा दयेकूम्ह कुपण्डोलया उम्ह व्यवसायीयात वयागु हे ज्याकुथी वनाः चुप्पा नःगु जुयाच्वन ।

मिसां उकिया किपा मोबाइलपाखें मसीक भिडियो नं खिचे याःगु जुयाच्वन । लिपा वहे भिडियो सार्वजनिक यानाबी धासें इन्दिरा उप्रेति व वया मिजं पासा बद्रिनाथ लामिछानें व्यवसायीयात ब्ल्याक मेल याःगु जुयाच्वन । चुप्पा नःगु भिडियो खिचे यायेधुंकाः लामिछानें व्यवसायीयात फोन यानाः छगू करोड दां मबिल धाःसा भिडियो सार्वजनिक यासें वयागु सामाजिक प्रतिष्ठा ध्वस्त याना बी धकाः ख्याच्वः बिउगु जुयाच्वन ।

थ्वयां लिपा पीडित व्यवसायीं थुकिया बारे प्रहरीयात उजुरी याना बिल । प्रहरीं थुकिया बारे अनुसन्धान यासें इन्दिरायात येँया टेकु व बद्रिनाथयात गौशालां ज्वंगु दु । आः उमित आपराधिक लाभया कसुर अन्तर्गत कारवाही यायेगु खँ प्रहरीं धाःगु दु । पीडितया नां धाःसा प्रहरीं सार्वजनिक याःगु मदु ।