नेपाःया डा. रुना झा कोरोना नियन्त्रणया निंतिं उत्कृष्ट ज्या याःपिनि धलखय्

येँ – संयुक्त राष्ट्र संघया यूएन वुमेनं कोरोना भाइरस नियन्त्रण यायेगु निंतिं उत्कृष्ट ज्या याःपिं न्याम्ह मिसातय् धलः सार्वजनिक याःगु दु । उगु धलखय् नेपाःया डा. रुना झा नं लानादीगु दु । वय्कः राष्ट्रिय जनस्वास्थ्य प्रयोगशाला टेकुया निर्देशक खः ।

डा. झाया नेतृत्वय् जनस्वास्थ्य प्रयोगशालाय् कोरोनाया परीक्षण जुयाच्वंगु दु । वय्कलं नेतृत्व यानादीगु टिमं न्हि ७०गू नमुना परीक्षण यायेगु ज्या यानाच्वनादीगु दु । परीक्षणया निंतिं वइगु नमुनाया छुं निश्चित ई मदइगुलिं बहनी तक नं च्वनेमाःगु व थःगु पुचःया निंतिं यातायात व खानाया नं व्यवस्था वय्कलं यानाच्वनादीगु दु ।

‘ल्याबय् लिबाक तक च्वनेगु सामान्य थें जुइधुंकल ।’ युएन वुमेन नाप खँल्हाबंला यानादिसें वय्कलं धयादी, ‘वया अतिरिक्त थःगु टिमया निंतिं यातायात व खानाया प्रबन्धया व्यवस्थापन नं यानाबीमाः ।’

वंगु फेब्रुअरी महिनाय् चीनया वुहान शहरं १७५म्ह नेपाली विद्यार्थीतय्त नेपाः लितहयेधुंकाः डा. झाया टिमया ज्या शुरु जूगु खः । चीनं लिहांवःपिं विद्यार्थीत क्वारेन्टिनय् तयातःगु थासय् दकलय् न्हापां वय्कःया टिम वनाः ज्या सुरु याःगु खः ।

वय्कःया निंतिं दलकय् प्राथमिकताया विषय खः, थःगु टिमया सुरक्षा । आः नेपालय् नं संक्रमितत अप्वया वनाच्वंगु इलय् थःगु टिमया कर्मचारीतय्त सुरक्षाय् विशेष ध्यान बीत इनाप यायेगु यानाच्वंगु दु । वय्कः थःगु टिमयात ग्वाहालि यायेगु व मनोबल अप्वयेकेगु ज्या यानाच्वनादीगु दु ।