समाजवादी व राजपा दथुइ पार्टी एकीकरण

येँ – समाजवादी पार्टी नेपाल व राष्ट्रिय जनता पार्टी (राजपा) दथुइ बुधवाः बहनी एकीकरण जूगु दु ।

सरकारं दल विभाजनया बारे अध्यादेश हःगु छुं न्हिया दुने हे निगू पार्टी दथुइ पार्टी एकीकरणया सहमति जूगु खः । राजपा अध्यक्ष मण्डलया दुजः शरदसिंह भण्डारीया छेँय् च्वंगु निगू दलया मुँज्यां न्हूगु एकीकृत दलया नां ‘जनता समाजवादी पार्टी, नेपाल’ तयेगु सहमति याःगु खः ।

निगूलिं पार्टीया छुं छुं नेतातय्सं पार्टी विभाजनया तयारी यानाच्वंगु खँ सीवं बुधवाः बहनी निगूलिं दलया शीर्ष नेतात च्वना पार्टी एकता यायेगु सहमतिइ थ्यंगु खः । सहमति कथं पार्टी एकीकरण समानतायाया आधारय् यायेगु खँ धाःगु दु । तर पार्टीया नेतृत्वया बारे धाःसा सहमति जूगु मदुनी ।

सहमति कथं न्हूगु पार्टीं समाजवादीं छ्यलाच्वंगु ध्वाँय् व राजपाया चुनाव चिन्ह छ्यलीगु जूगु दु । सहमतिइ समाजवादीपाखें डा. बाबुराम भट्टराई, उपेन्द्र उादव, अशोक राई व राजेन्द्र श्रेष्ठं ल्हाःचिं तयादीगु खःसा राजपायापाखें महन्थ ठाकुर, राजेन्द्र महतो, महिन्द्र राय यादव व शरदसिंह भण्डारीं ल्हाःचिं तयादीगु खः ।