हिरासतय् तयेहःम्हेसिया कोरोनाया आरडिटी परीक्षण पोजेटिभ

येँ – सप्तरीइ थः हे जिचादाजुया न्हाय्पं चानाबिउगु द्वपनय् ज्वनाहःम्ह छम्ह मनूया कोरोना संक्रमणया निंतिं र्‍यापिड टेस्ट यानास्वःबलय् पोजिटिभ खनेदुगु दु ।

थः जिचादाजु सोगवीर रामया न्हाय्पं चानाबिइवं ४८ दँया उम्ह मनूयात ज्वना हःगु खः । आरडिटीइ पोजिटिभ खनेदयेवं उम्ह मनूयात हिरासतय् मतसे राजविराजय् च्वंगु गजेन्द्रनारायण सिंह अस्पतालया आइसोलेसनय् तयेयंकूगु दु ।

सप्तरीया चनही मल्हनियाय् च्वंम्ह उम्ह मिजं ससलय् घरज्वाँइ च्वनाच्वंम्ह खः । जिचादाजुलिसे जग्गाया खँय् विवाद जुयाच्वंगु खः । सोमवाः सिमा पालेगु विषयय् ल्वापु जुइवं जःगु खुकुरीं जिचादाजुम्हेसिया न्हाय्पं चानाबिउगु खः । उम्ह मनुखं गःपतय् पालेत स्वःगु खःसां छले याःबलय् न्हाय्पनय् लाःगु खँ धाःगु दु ।

न्हाय्पं हे चहिउम्ह सोगवीरया उपचार धरानय् च्वंगु बिपी कोइराला स्वास्थ्य विज्ञान प्रतिष्ठानय् जुयाच्वंगु दु ।

आरडिटि पोजिटिभ खनेदुम्ह आक्रमण याःम्ह जिलाजंम्हेसिया स्वाब परिक्षणया निंतिं धरान छ्वःगु दु ।