नेवाः कलाकारतय्गु फुटसल जुइगु
येँ – सुखावति मल्टि प्रोडक्सनया ग्वसालय् स्वक्वःगु नेवाः कलाकार फुटसल कासा जुइगु जूगु दु । स्वस्थ कलाकार, स्वस्थ मनोरञ्जन धइगु नारा बियाः जुइत्यंगु उगु कासा थनया पकनाजोलय् च्वंगु कुमारी फुटसलय् जुइ । कासाया निंतिं छनोट जूपिं टिम क्याम्टेन व कासामिपिं म्हसीकेगु ल्याखं वंगु शनिवाः छगू पत्रकार सम्मेलन यासें बिउगु जानकारीकथं वइगु शनिवाः उगु कासा जुइ ।
थुगुसी जुइगु कासाय् मिजंपाखे झिंनिगू व मिसातय् खुगू टिमया दथुइ प्रतिस्पर्धा जुइगु प्रोडक्सनया नायःलिसें नांजाःम्ह निर्देशक कलाकार सुरेन्द्र तुलाधरं पत्रकार सम्मेलनय् जानकारी बियादिल । थ्व स्वयां न्ह्यः निक्वः तक जूगु कासाय् मिजं कलाकारतय् च्यागू व मिसा कलाकारतय् प्यंगू पुचःया दथुइ कासा जूगु व थुगुसी ब्वति काइपिं कलाकार कासामिं अप्वःगुलिं थःपिंत छगू उत्साह ब्वलंगु धासें थुगु कासायात निरन्तरता बिया वनेगु विचाः दुगु नं वय्कलं धयादिल ।
उगु कासाय् ब्वति कायेगु निंतिं क्वःछिनातःगु निश्चित शुल्कमध्ये छम्ह कासामिया न्यासःतका दांया ल्याखं आर्थिक ग्वाहालि मुंकाः ताःई न्ह्यवंनिसें म्हं मफयाच्वंम्ह नांजाःम्ह कलाकार स्वतन्त्र संसार महर्जनयात आर्थिक ग्वाहालि नं लःल्हायेगु ज्याझ्वः दुगु वय्कलं जानकारी बियादिल ।
पत्रकार सम्मेलनय् हे एम्स इन्टरटेनमेन्टं न्यय्द्वः तका व वरिष्ठ समाजसेवी विश्वरत्न तुलाधरं न्ययद्वः तका दां नं महर्जनयात ग्वाहालिकथं लःल्हायेगु बचं बियादिल ।
थुगुसी जुइगु कलाकार फुटसल कासाय निंतिं मिजंपाखे मोहन ब्यञ्जनकार, धिरेन शाक्य, भीम तुलाधर, सुरेश प्रधान, पुष्पराज शाक्य, अमरराज शर्मा, उजय शाही, सुरेन्द्र महर्जन, नागय डंगोल, राजेन्द्रमान शाक्य, सलिलसुन्दर तुलाधर, संजय शर्मा क्याप्टेन ल्यःगु दुसा मिसापाखे हिसिला महर्जन, रचु शाक्य, सरना श्रेष्ठ, राज्यलक्ष्मी स्थापित, रुक्साना महर्जन व पल्पसा डंगोलयात ल्यःगु दु ।
कासाय् विजयी जूपिंत मेगु वालय् छगू सांस्कृतिक ज्याझ्वःयासें सिरपाः लःल्हायेगु व उगु हे ज्याझ्वलय् कलाकार महर्जनयात नं आर्थिक ग्वाहालि लःल्हायेगु पत्रकार सम्मेलनय् जानकारी बिउगु खः ।
नेपालभाषाया नांजाःम्ह निर्देशकलिसें ख्यालःम्वः गणेश साय्मि, वरिष्ठ समाजसेवी विश्वरत्न तुलाधर, बुद्ध शाही, फिल्म वितरण गोपालकाजी कायस्थ, गोविन्द महर्जन, सिने पत्रकार विजयरत्न असंबरेलिसें आपालं कलाकारपिनिगु उपस्थिति दुगु पत्रकार सम्मेलन प्रोडक्सनया छ्यांजे नील शाक्यया सभापतित्वय् जूगु खःसा दुजः रुमन जोशीं लसकुस यानादीगु खः ।
LEAVE YOUR COMMENTS