येँय् आइतवाःनिसें स्कुल चायेकीगु
अभिभावकपिं माने मजूसा चायेकेत अनिवार्य मदु
येँ – येँ महानगरपालिकां कंसंनिसे स्कुल चायेकेगु निर्णय याःगु दु । महानगरपालिकाया शिक्षा विभागया बैठकं आइतवाःनिसें स्कुल चायेकेत अनुमति बीगु निर्णय याःगु खः । स्कुल चायेकेगु नितिं भौतिक रुपं विद्यालय व्यवस्थापन समितिया बैठक च्वनाः अभिभावकया सहमति कायेमाःगु व वहे कथं कार्ययोजना दयेकाः महानगरय् पेश यायेमाःगु व्यवस्था याःगु दु । विद्यालयं महानगरय् बिउगु कार्ययोजना कथं महानगरं भौतिक रुपं विद्यालय चायेकेत अनुमति बी ।
विद्यालय चायेकेगु नितिं महानगरपालिकां महानगर दुनेया परिस्थिति कथं ‘कस्टुमाइज्ड मापदण्ड’ दयेकूगु व विद्यालयं उगु २७ गू मापदण्ड अनिवार्य लागू यायेमाःगु खँ विभाग प्रमुख रामप्रसाद सुवेदीं कनादीगु दु ।
विद्यालय सञ्चालन याये न्ह्यः अभिभावक, शिक्षक, संघसंस्था लिसे सरोकारवालया सहभागिताय् विद्यालय व्यवस्थापन समितिया बैठक च्वनाः थवंथवय् समझदारी दयेकाः जक भौतिक रुपय् विद्यालय सञ्चालन यायेगु÷याकेगु व्यवस्था मिले यायेगु, विद्यालय सञ्चालनया विस्तृत कार्ययोजना दयेकाः महानगरया शिक्षा शाखाय् पेश यायेमाःगु, शिक्षक, विद्यालय कर्मचारी, चालक फुकसितं अनिवार्य खोप कायेमाःगु व्यवस्था यानातःगु दु ।
छुं गथे जुयाः शिक्षक, कर्मचारी, चालक सुनां नं खोप काये ल्यं दनिगु खःसा महानगरपालिकां खोप कायेगु व्यवस्था नं याइगु खँ विभाग प्रमुख सुवेदीं कनादीगु दु । अथे खःसां यक्व विद्यार्थी दयाः वा अभिभावकपिं ग्याःगु अवस्थाय् विद्यालय चायेकेत अनिवार्य धाःसा मयानागु खँ नं सुवेदीं कनादिल ।
थ्व स्वयां न्ह्यः स्वनिगःया थीथी नगरपालिकां थःगु नगरय् कोरोना संक्रमणया ल्याः म्हो जूगु धासें भौतिक उपस्थितिइ विद्यालय चायेकेगु शुरु यायेधुंकूगु दु ।
उकथं हे यल महानगरपालिकाय् नं आशिंक रुपं विद्यालय चायेके धुंकूगु खँ सीदुगु दु । महानगरय् अभिभावक, विद्यार्थी व शिक्षकया मिश्रित प्रतिक्रिया वयेवं विद्यालययात हे विद्यालय चायेकेगु वा मचायेकेगु अधिकार बिउगु खः ।
यल महानगरपालिकाया कथं म्हो विद्यार्थी दुगु विद्यालय भौतिक रुपं सञ्चालन जूगु दु । भौतिक रुपं ब्वंकेगु नितिं सुरक्षा मापदण्ड अनिवार्य पूवंकेमाः कथं विद्यालय चायेकेगु ज्या जुयाच्वंगु खँ यल मनपां धाःगु दु । तर आपाः विद्यार्थी दुगु विद्यालयत धाःसा अझ नं चायेकेगु सम्भावना मदुगु खँ धाःगु दु ।
LEAVE YOUR COMMENTS