सुनां इनाच्वन थज्याःगु टीशर्ट ? येँया नां स्यंकाः ‘बालेन सिटी’ दयेकेगु सुनियोजित षडयन्त्र
येँ (नेपालभाषा टाइम्स)÷ऐतिहासिक नगरी येँ देय्या नां स्यंकाः थुकियात ‘बालेन सिटी’ धकाः ब्राण्डिङ यायेगु ज्याय् येँ मनपाया मेयर बालेन साहया हे पुचः सुनियोजित रुपं सक्रिय जुयाच्वंगु सीदुगु दु । बालेन समर्थित थ्व पुचलं थुगुसी यँयाः पर्वया लसताय् लाकाः बालेन साहया ख्वाःपाः सहित ‘बालेन सिटी’ धकाः च्वयातःगु टीशर्ट हे इनेगु ज्या यानाच्वंगु नं सीदुगु दु । उमिसं थज्याःगु टीशर्ट पुनाः पुचः हे जानाः जात्राय् चाःहिलेगु ज्या समेत याःगु खःसा प्रहरीपाखें उमित लँय् हे पनातःगु खः ।
बालेन समर्थक पुचःतय्सं अज्याःगु टीशर्ट इनेगु लागिं सामाजिक सञ्जालय् उकिया किपा समेत तयाः प्रचार यानाच्वंगु नं लूगु दु । येँ देय्यात ‘येँ’ वा ‘काठमाडौं’ मधासे ‘बालेन सिटी’ धकाः छुं ई न्ह्यवंनिसें प्रचार याना वयाच्वंगु खः । थ्व प्रचार स्वतस्फूर्त खः धकाः मनूतय्सं थुइकेगु याना वयाच्वंगु खःसां थ्व वास्तवय् स्वतस्पूmर्त मखु, सुनियोजित खः व अज्याःगु ज्या स्वय्म बालेनया पुचलं यानाच्वंगु खः धइगु खँ आः वयाः पुष्टि जूगु खः ।
बालेन समर्थकतय्सं थ्व यँयाःबलय् अज्याःगु टीशर्ट निःशुल्क इनेगु व टीशर्ट पुनाः चाःहिलीपिंत ध्यबा समेत बियाच्वंगु खँ नं धाःगु दु । बालेनया अज्याःगु टीशर्टया प्रचार यायेगु ज्याय् थःत अभियन्ता धकाः परिचय बीपिं छुं स्थानीय नेवाःत हे लगे जुयाच्वंगु नं खने दया वःगु दु ।
लुमंकेबहः जू, येँया थीथी वडाया वडा अध्यक्षतय्सं येँ देय्या नांयात स्यंकाः ‘बालेन सिटी’ धकाः ब्राण्डिङ यायेगु ज्या जुयाच्वंगु दु धासें उकिया विरोध यानाच्वंगु खः । येँ देय्यात बालेन सिटी धकाः सामाजिक सञ्जालतय्सं प्रचार यानाच्वंगु खँय् वडा अध्यक्षतय्सं विरोध याःबलय् मेयर साहं अज्याःगु ज्या थम्हं याकागु मखु धकाः प्रतिकार यानादीगु खः ।
तर थुगु यँयाःबलय् धाःसा वय्कःया समर्थकतय्सं हे बालेन सिटी धकाः च्वयातःगु टीशर्ट इनाच्वंगु कारणं थ्व ज्याय् बालेन साहया समेत संलग्नता दुगु पुष्टि जूगु खँ धयाहःगु दु । बालेन साहं ऐतिहासिक येँ देय्या नां समेत स्यंकाः थःगु नामं तयेकेगु कुत्सित मनसाय ज्वनाच्वंगु प्रष्ट जूगुलिं थुकिया कडा रुपं विरोध यायेमाःगु खँ धयाहःगु दु ।
LEAVE YOUR COMMENTS