ने. सं. ११४६ अनलाथ्व चतुर्दशी -

नेपाः पार्टीपाखें सर्वदलीय सरकारया माग

येँ । विश्वन्यंकं महामारी जुयाः न्यना वनाच्वंगु कोेरोना भाइरस (कोभिड–१९) लिसे ल्वायेगु लागिं नेपाः सरकारं तुरुन्त हे सर्वदलीय सरकार गठन यानाः न्ह्याः वनेमाःगु माग नेपाः राष्ट्रिय पार्टीं याःगु दु ।

पार्टीया नायः डा. विजयप्रकाश सैंजुं थन छगू वक्तव्य पित बिसें थ्व इलय् सुं नं विपक्षी जुयाः स्वया जक च्वनेगु मयासे छधी छप्पँ जुयाः कोरोना महामारीलिसे ल्वायेमाःगु जूगुलिं तुरुन्त हे सर्वदलीय बैठक सःताः सर्वदलीय सरकार गठन यायेमाःगु सुझाव बियादीगु खः ।

वक्तव्यय् सरकारं लकडाउन लागू याये न्ह्यवंनिसें येँय् थानाच्वंपिं जिल्लावासीतय्त छेँय् लिहां वनेगु अवसर बीमाः धासें सरकारं अज्याःगु वातावरण मदयेकूगु कारणं थौंकन्हय् आपालं नेपाःमित सलंसः किलोमिटर ताःहाकःगु लँपु न्यासि हे वनाः छेँय् थ्यंकाच्वंगु दुःखद् खँ खः धयातःगु दु ।