ग्वंगःबुँइ हिदान जुल

येँ – ब्लड डोनार्स एशोसियसन (ब्लोडान)या आह्वानय् जुयाच्वंगु डोर टु डोर हि संकलनया झ्वलय् आइतवाः ग्वंगःबुँइ जूगु हिदान ज्याझ्वलय् ११० पिन्ट हि संकलन जूगु दु । सामुदायिक सेवा केन्द्र ग्वंगःबुँया ग्वसालय् ग्वंगःबुँ बसपार्क लिक्क थौं हिदान जूगु खः ।

हिदान ज्याझ्वःया निंतिं ब्लोडानया केन्द्रीय नायः सानुबाबु प्रजापति, केन्द्रीय दुजःपिं विनोद तुलाधर, पुरुषोत्तम खत्री, किशोर वन्त, ब्लोडान येँया सचिव व संयोजक अनिलरत्न तुलाधरपिंसं सहजीकरण यानाबिउगु खः ।

कोरोना भाइरसया खतराया कारणं सरकारं याःगु लकडाउन लिपा न्ह्याःगु डोर टु डोर हि संकलनया झ्वलय् ग्वंगःबुँइ जूगु ३४ औं ज्याझ्वः खः । थौं ख्वपया चाँगुइ नं हिदान ज्याझ्वः जूगु खः । थन २२ पिन्ट हि संकलन जूगु खँ धाःगु दु ।