अमेरिकायात ओलीं लिसः बीला ?

नेपालय् चिनियाँ प्रभाव अप्वःगु अमेरिकाया द्वपं

येँ – नेपालं थःगु देशय् च्वनाच्वंपिं तिब्बती शरणार्थीतय्त दमन यानाः चिनियाँ प्रभाव अप्वयेकाच्वंगु धकाः अमेरिकां बिउगु द्वपंयात प्रधानमन्त्री केपी शर्मा ओलीं अजरबैजानय् खण्डन यानादी फइगु खँ धाःगु दु । अमेरिकाया एशिया प्रशान्त क्षेत्र मामिला स्वइम्ह उपमन्त्री एलिस जी. वेल्सं आः नकतिनि अमेरिकाय् न्ववासें नेपालय् तिब्बती शरणार्थीतय्त दमन यानाच्वन धासें टिप्पणी यानादीगु खः ।

वय्कलं नेपालय् धार्मिक अल्पसंख्यकतय्त थाकुगु अवस्थाय् लाकातःगु व धार्मिक दलाई लामाया बुन्हि तकं न्यायेके मबिउगु द्वपं बियादीगु खः । लुमंकेबहः जू, चिनियाँ राष्ट्रपति सी चिनफिङ नेपाः भ्रमणय् वःगु इलय् भ्रमण प्रभावित यायेत फ्रि तिब्बतया ध्वाँय् ज्वनाः वयाच्वंपिं झिम्ह तिब्बती शरणार्थीतय्त ज्वंगु खःसा उकी मध्ये निम्हेसित सार्वजनिक मुद्दा चले याःगु खः ।

अमेरिकी उपमन्त्रीया थ्व टिप्पणीयात नेपाल सरकारया प्रवक्ता एवं सञ्चारमन्त्री गोकुल बास्कोटां धाःसा खण्डन यानादीधुंकूगु दु । सञ्चार माध्यमलिसे खँ ल्हासें मन्त्री बास्कोटां नेपालय् च्वनाच्वंपिं तिब्बती नागरिकत शरणार्थी जूगु कारणं उमित नेपाली नागरिक सरह सम्पूर्ण अधिकार मदइगु खँय् सकलें स्पष्ट जुइमाः धयादिल ।

‘छुं देशया राष्ट्रपति छम्हेस्यां भ्रमण यात धायेवं उगु देशया प्रभाव अप्वल धाये फइ मखु’ वय्कलं धयादीगु दु । तिब्बतीत नेपालय् शरणार्थी कथं च्वनाच्वंगु जूगुलिं उमिसं शरणार्थी कथं हे व्यवहार यायेमाःगु बिचाः नं वय्कलं तयादिल । नेपालं शरणार्थीतय्त गज्याःगु व्यवहार यात धइगु खँ मानव अधिकारलिसे सम्बन्धित विषय मखुसें थ्व नेपाःया परराष्ट्र मामिला सञ्चालनलिसे सम्बन्धित विषय जूगु खँ नं वय्कलं स्पष्ट यानादिल ।

अमेरिकां याःगु थ्व टिप्पणीयात कयाः नेपाः सरकारपाखें नं स्पष्ट टिप्पणी वये फुगु खँ धाःगु दु । अमेरिकी उपमन्त्रीं न्ववाःगु खँपाखें अन्तर्राष्ट्रिय ख्यलय् समेत नेपाःया बारे गलत सन्देश वने फइगु जूगुलिं उकियात कयाः सरकारं स्पष्ट धारणा तये माली धकाः परराष्ट्र मन्त्रालयय् परामर्श जुयाच्वंगु खँ धाःगु दु ।

लिसें अजरबैजानय् जुयाच्वंगु असंलग्न राष्ट्रतय् सम्मेलनय् विश्व समुदाय न्ह्यःने नं प्रधानमन्त्रीपाखें थुकिया बारे स्पष्ट खँ तयेमाःगु बिचाः परराष्ट्र मन्त्रालयया अधिकारीतय्सं तयाच्वंगु दुसा उकिया लागिं प्रमयात सुझाव नं बीधुंकूगु खँ सीदुगु दु ।

कार्तिक १३ गते सार्वजनिक बिदा
येँ(नेपालभाषा टाइम्स)÷सरकारं आः वइगु कार्तिक १३ गते नं किजापुजाया सार्वजनिक बिदा बीगु निर्णय याःगु दु । थुगुसी तिथि विवादं यानाः गुलिस्यां कार्तिक १२ गते व गुलिस्यां कार्तिक १३ गते किजापुजा याइगु जूगु खः । सरकारं कार्तिक १२ गते बिदा बियातःगु दुसां कार्तिक १३ गते बिदा मदुगुलिं थ्वकुन्हु विदाया लागिं मन्त्रिपरिषदं निर्णय यायेमाःगु खः ।

कार्तिक १३ गते नं सार्वजनिक विदा बीगु माग यासें येँया नेकपा संघीय सांसद कृष्णगोपाल श्रेष्ठया नेतृत्वय् प्रदेश सांसदपिं डा. अजयक्रान्ति शाक्य, राजेश शाक्य व येँ २२ वडाया अध्यक्ष चिनिकाजी महर्जनपिं प्रम ओलीयाथाय् डेलिगेशन वंगु खः । उगु इलय् प्रम ओलीं १३ गते बिदा बीगु बचं बियादीगु दु ।

सम्बन्धित बुखँ

LEAVE YOUR COMMENTS