येँ महानगरया एप्स डाउनलोड यानादिसँ, डाक्टरलिसे तप्यंक खँ ल्हानादिसँ

येँ ÷ कोरोना (कोभिड–१९) या सम्भावित महामारीयात पनेत व निगरानी यायेत येँ महानगरपालिकापाखें थीथी संस्थालिसे समन्वय यानाः दयेकूगु मोबाइल एप्स आः न्ह्याम्हेस्यां नं डाउनलोड यानाः कोरोना संक्रमण सम्बन्धी थःगु स्वास्थ्यस्थिति सीका काये फइगु जूगु दु ।

थ्व एप्स डाउनलोड यानाः महानगरभित्र दुने च्वंपिं न्ह्याम्हेस्यां नं थःपिं सावधान जुइमाःगु खः लाकि मखु ? छेँय् हे सुरक्षित जुयाः च्वंसां गाः वा अस्पताल हे वनेमाः ? थःपिनि लागि विशेषज्ञ स्वास्थ्य सेवा आवश्यक जुइ लाकि जुइ मखु ? थेंज्याःगु स्वास्थ्य सम्बन्धी अवस्था सीके फइ ।

‘नेपाल कोविड–१९ निगरानी प्रणाली’ नां तयातःगु थ्व एप्सपाखें मू रूपं प्यता ज्या याइ – (१) लक्षणत स्वयाः कोरोना संक्रमणया स्वमूल्यांकन यायेगु ज्या याइ, (२) स्वमूल्यांकन मार्फत सम्भावित लक्षण खने दुपिं मनूतय्त तुरुन्त चिकित्सकतय्सं हे फोन मार्फत स्वापू तयाः माःगु परामर्श बीगु ज्या याइ, (ग) स्वमूल्यांकन तथा फोन परामर्श लिपा ल्वय्या सम्भावना अप्वः खने दुपिं मनूतय्त एम्वुलेन्सया व्यवस्था यानाः खै व स्वाब परीक्षणया लागि तोके यानातःगु अस्पतालय् यंकेगु ज्या याइ, (घ) भौगोलिक सूचना प्रणाली (GIS) या माध्यमं सम्बन्धित निकाययात संक्रमण नियन्त्रणया लागि थप उपायत नाला कायेगु लागिं ग्वाहालि यायेगु ज्या याइ ।

थ्व एप्स चायेकेवं उकी टिक् चिं तयाः जायेकेगु लागिं छुं न्ह्यसःत बिया हइ । छितः छु छु जूगु दु धकाः उकी न्ह्यसःत तयातइ । थःत छु जूगु खः उकी टिक् चिं तयाः फाराम ‘इन्ट्री’ यायेवं छुं ई लिपा हे सम्बन्धित डाक्टरं छितः फोन याना हइ । छितः छु जूगु खः न्यनेकने यायेधुंकाः माःगु सल्लाह बी । आवश्यक जुल धाःसा तुरुन्त एम्बुलेन्स हे छ्वयाः छितः अस्पताल तक यंकेगु ज्या समेत याइ । छितः कोरोनाया शंका दु तर अस्पताल थ्यंक यंकेमाःगु अवस्था मदुसा नियमित रुपं सम्पर्क तयाः छितः ‘फलोअप’ समेत यानाच्वनी ।

येँ महानगरपालिकां नेपाल रिसर्च एडुकेशन नेटवर्क, जनस्वास्थ्य सरोकार ट्रष्ट, इनोभेटिभ सोलुसन, नेपाल डिजास्टार–इमर्जेन्सी मेडिसिन सेन्टर लगायतया संघसंस्थातय् साझेदारिताय् दयेकूगु थ्व प्रणाली मोबाइलया ‘प्ले स्टोर’ पाखें डाउनलोड याये फइ ।

आःयात थ्व प्रणाली येँ महानगरपालिकाय् पूर्ण रूपं लागू जूगु दु । तर, महानगरपालिकां पिने च्वंपिंसं नं थःपिनि स्वास्थ्य अवस्थाबारे जानकारी कायेत थ्व एप्सयात छ्यले फइ ।

येँ महानगरपालिकां थ्व एप्स प्रयोग यानाः कोरोना ल्वय् पुनेगु पाखें थःबचे जुइत व मेपिंत नं बचे यायेत इनाप याःगु दु । ‘नेपाल कोविड–१९ निगरानी प्रणाली’ डाउनलोड यायेत क्वय् बियागु लिंकय् क्लीक याये फइ ।

Nepal Covid-19 Surveillance System

https://play=google=com/store/apps/details…

नेपालभाषा टाइम्स

च्वमिया मेमेगु

• चित्तरन्जन नेपालीयात लुमंकल
• मतया तार भूमिगत यायेगु ज्या बेवारिस
• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु