ने. सं. ११४४ कौलाथ्व पारू - नःलास्वनेगु

नेपाल ट्रष्टया जग्गाय् नपाया पःखाः

ख्वप – नेपाल ट्रष्टय् दर्ता जुयाच्वंगु सल्लाघारीया ९९ रोपनी धाःगु १०८ रोपनी जग्गा संरक्षण यायेगु ल्याखं ख्वप नगरपालिकां जःखः पःखाः दनेगु ज्या म्हिगःनिसें शुरु जूगु दु । नेमकिपाया केन्द्रीय सचिव व संघीय संसदया सांसद प्रेम सुवालं उगु पःखाः दनेगु जग स्वनादिल । जग स्वनेज्याय् वय्कलं संस्कृति सम्पदा संरक्षण, सरसफाई आदि ज्याय् स्थानीय समुदायपाखें दुग्यंगु ग्वाहालि चूलायेमाःगु खँ कनादिल ।

वय्कलं ख्वप नगरपालिकाया आर्थिक अनुशासन व जनताया इमानदारितापूर्वक सेवा यायेगु ज्याया कदर यासें ट्रान्सपरेन्सी इन्टरनेशनलं नीदँ न्ह्यः सदाचारया टापू धाइगु उपाधिं छाय्पियातःगु व दक्षिण एशियाय् हे सफा व संस्कृति संरक्षण याःगु ल्याखं युनेस्को सिरपा लःल्हानाः ख्वप नगरपालिकाया ज्यायात कदर याःगु खँ नं स्पष्ट यानादिल ।

ख्वप नगरपालिकां ग्वसाः ग्वःगु उगु ज्याझ्वलय् ख्वप नगरपालिकाया मेयर सुनिल प्रजापतिं ख्वप नगरया सन्तुलित विकासया लागिं यानाच्वंगु ज्याझ्वःया झ्वलय् हे ख्वप नगरपालिकां थुगु पर्ति जग्गा संरक्षण यानाच्वनागु खँ कनादिल । जनताया सेवा यायेगु बाहेक थःपिनि मेगु छुं नं कथंया स्वार्थ मदु धासें नगर प्रमुख सुनिल प्रजापतिं जनताया ग्वाहालिं हे थुगु १०८ रोपनी जग्गाया संरक्षण यायेत्यनागु खँ कनादिल ।

ज्याझ्वलय् ख्वपया प्रमुख जिल्ला अधिकारी नारा– यण प्रसाद भट्ट, पःखाः दनेगु उपभोक्ता समितिया अध्यक्ष लक्ष्मीनारायण राजलवट खत्री, ख्वप नगरपालिका वडा नं. १ या वडा अध्यक्ष श्यामकृष्ण खत्री, प्रहरी उपरीक्षक एसपी हिमालयकुमार श्रेष्ठपिंसं नं थःथःगु नुगः खँ तयादीगु खः ।