ने. सं. ११४३ तछलाथ्व द्वादशी -

चखुबखुंचित नं येँ मनपां नकीगु, राहत मापदण्ड पारित

येँ – येँ महानगरपालिकां सरकारं कोरोना संक्रमण पनेगु निंतिं तयातःगु लकडाउनया कारणं समस्या लाःपिंत राहत वितरणया निंतिं कोभिड १९ सम्बन्धी राहत वितरण मापदण्ड २०७६ नं पारित याःगु दु । मनपाया सोमवाः च्वंगु ४३ क्वःगु कार्यपालिका बैठकं थ्व मापदण्ड पारित याःगु खः ।

मापदण्ड कथं अभिभावक मदुपिं, थःगु आयस्रोत मदुपिं, अनाथाश्रम, वृद्धाश्रम, संरक्षण गृह, देगः, गुम्बा, मस्जिद थेंज्याःथाय् आश्रमस्थलय् च्वनाच्वंपिं, मेपिनि ग्वाहालि व सहाराय् म्वानाच्वंपिं असक्त कथं । आम्दानीया छुं स्थायी स्रोत मदुपिं, न्हियान्हिथं म्वायेत तकं धोधौ जूपिं व सम्बन्धित वडां अतिविपन्न धकाः प्रमाणित यानातःपिं व्यक्ति वा परिवारयात अतिविपन्न परिवारय् दुथ्याकूगु दु । अथेहे संगठीत संस्थाय् ज्या याइपिं बाहेक येँ महानगरपालिकाय् न्हापांनिसें न्हियान्हिथं ज्याला कयाः ज्यामि ज्या याना वयाच्वंपिं, येँ छेँ बुँ मदुपिं भरिया लगायतयात दैनिक ज्यालादारीइ ज्या याइपिं धकाः मापदण्डय् न्ह्यथनातःगु दु ।

मेयर शाक्यं थज्याःपिं मनूतय्त नयेत्वनेगु समस्या जुइफुगुलिं उमित राहत बीगु निंतिं थ्व मापदण्ड तयार यानागु खँ धयादीगु दु । वय्कलं राहतया निंतिं तःधंगु वडायात प्यंगू लाख, मझौला वडायात स्वंगू लाखया निसें चीधंगु वडायात नं ध्यबा निकास यायेधुनागु खँ धयादीगु दु । वय्कलं आवश्यक जुल धाःसा थप रकम निकासा जुइगु खँ नं धयादीगु दु ।

येँ मनपापाखें वडाय् छ्वःगु थ्व हे राहत ध्यबा पाखें वडाय् दुपिं चखुंबखुं, पशुपंक्षीतय् आहार नं व्यवस्था याइगु जूगु दु । थीथी देगलय् वइपिं मनूतय्सं नकीगु आहारां म्वानाच्वंपिं चखुंबखुंतय्सं थौंकन्हय् मनूतय् पिहां वये मदुगुलिं नये मखनाच्वंपिं दु । अज्याःपिं चखुबखुंतय्त नं वडापाखें आहारा चूलाकाबीगु खँ मेयर शाक्यं धयादीगु दु ।

लकडाउनया इलय् खाद्यान्न, ग्यास लगायतया न्हियान्हिथंया उपभोग्य सामान अभाव जुइफु धयागु आशंका जुयाच्वंगुलिं थज्याःगु समस्या नं मदयेकेगु कार्यपालिका बैठकं निर्णय याःगु खँ मेयर शाक्यं धयादीगु दु ।