‘बागदरवार न्हापा हे मदयेधुंकल’

येँ – येँ महानगरपालिकाया ज्याकू दयेकेगु धकाः प्रस्तावित जुयाच्वंगु ‘बागदरवार’ नं धाइगु पुलांगु भवन थुने दइ मखु धकाः सर्वोच्च अदालतं नकतिनि जारी याःगु अन्तरिम आदेश पूर्वाग्रहपूर्ण जूगु महानगरपालिकाया मेयर विद्यासुन्दरं कनादीगु दु । येँ महानगरपालिकां थः सकलें जनप्रतिनिपिनि लागिं याःगु अभिमुखीकरण ज्याझ्वःया उलेज्या यासें वय्कलं थ्व खँ कनादीगु खः । सर्वोच्च अदालतं थ्व आदेश जारी यायेगु लागिं महानगरपालिकायाके छसः तक हे मन्यंगु खँ नं वय्कलं कनादिल ।

महानगरपालिकां थःगु ज्याकू दनेगु धकाः प्रस्तावित यानातःगु थ्व भवनयात ‘बागदरवार’ धकाः पिने धायेगु याःसां थ्व वास्तवय् बागदरवार हे मखुगु खँ वय्कलं कनादिल । थ्व लागाय् भिमसेन थापां छ्यलेगु यानाच्वंगु बागदरवार ९० सालया भुखाचय् दुना वनेधुंकूगु खँ कँसें थौंकन्हय् महानगरपालिकाया ज्याकू दुगु भवन बागदरवार मखुसें ‘हरिभवन’ जूगु खँ नं वय्कलं कनादिल ।

न्हापाया बागदरवारया किपा समेत सार्वजनिक जुइधुंकूगु अवस्थाय् आः दुगु ‘हरिभवन’ यात हे बागदरवार धाये मजिउगु दावी नं वय्कलं यानादिल । वय्कलं धयादिल, ‘द हे मदुगु बागदरवार थुने दइ मखु धकाः सर्वोच्च अदालतं आदेश बिउगु मिले मजू ।’

ऐतिहासिक महत्वया बागदरवार संरक्षित यायेमाः धासें छुं ई न्ह्यः छथ्वः सम्पदाप्रेमितय्सं तःगु रिटय् सर्वोच्चं उगु छेँ थुने दइ मखु धकाः उगु आदेश जारी याःगु खः । सम्पदाप्रेमितय्सं थ्व भवन ऐतिहासिक महत्वयागु जूगुलिं उकियात रेक्टोफिटिङ यानाः सुरक्षित यायेमाः धकाः माग याना वयाच्वंगु दु ।

मेखे कामपाया कर्मचारीतय्सं धाःसा थौंकन्हय् मनपाया ज्याकू तयातःगु उगु भवन तसकं जीर्ण जूगुलिं अन च्वनेत हे ग्यानापूगु खँ धाःगु दु । अन ज्याकू च्वने मछिनाः थौंकन्हय् अन च्वनाच्वंगु मनपाया थीथी फाँटया ज्याकू अलग अलग थासय् च्वं वनाच्वंगु दु । मनपाया ज्याकू थथे छरे जुयाः च्वं वंगुलिं सेवाग्राही नगरवासीयात थाकुयाच्वंगु खँ नं धाःगु दु ।

थ्वहे झ्वलय् मेगु छगू सूत्रं सर्वोच्चपाखें वःगु थ्व आदेश राजनीतिक पूर्वाग्रहं प्रेरित जूगु खँ नं धाःगु दु । सर्वोच्चया न्यायाधीश दीपकराज जोशीया इजलाशं थ्व आदेश जारी याःगु खः । न्यायाधीश जोशी सत्तारुढ दल नेपाल कम्युनिष्ट पार्टीया विरोधं यानाः प्रधानन्यायाधीश जुइ मखंगु खः । आः येँ मनपाया मेयर नं सत्तारुढ दलयाम्ह हे जूगुलिं वय्कलं उकिया हे तं कथं थज्याःगु फैसला याःगु अनुमान सूत्रं याःगु दु ।