चीनं हःगु मेडिकल सामान येँय् थ्यन, छगू लाख थान पीपीइ हइगु

येँ- –चीनया ग्वान्झाओं मेडिकल सामग्री हयेत वंगु नेपाल वायुसेवा निगमया जहाजय् सामान ज्वनाः येँ लिथ्यंकःवःगु दु । आइतवाः सुथय् जहाज त्रिभुवन अन्तर्राष्ट्रिय विमानस्थलय् लिथ्यंगु खः ।

चीनया ग्वान्झाओं थ्यंमथ्यं १३ हजार केजी स्वास्थ्य सामग्री एयरलिफ्ट यानाः येँय् हःगु खः । थुकी कोरोना भाइरस परीक्षणया निंतिं माःगु किट लिसें पिपिइ लगायतया मेडिकल सामान दुगु खँ धाःगु दु । सरकारं छगू आयात कम्पनी ओबीसीआइ प्राइभेट लिमिटेड मार्फत थ्यंमथ्यं छगू अर्ब २४ करोड तका बराबरया चीनं मेडिकल सामान न्यायेत्यंगु खः । थ्व हे सामान आइतवाः येँ थ्यंकः हःगु खः । आयात कम्पनीं स्वक्वः यानाः थुपिं सामान हइगु खँ धाःगु दु ।

आइतवाः हःगु सामानय् चिनियाँ दुतावास, चिनिया अनलाइन सपिंग कम्पनी अलिबाबा, व्यापारी ज्याक मां व चीनया सिचुआन प्रान्तीय सरकारपाखें अनुदान कथं बिउगु सामान नं दुगु खँ धाःगु दु ।

सरकारं चीनपाखें पीपीइ छगू लाख थान, सुरक्षित गगल्स छगू लाख थान, पञ्जा छगू लाख थान, सफाइलय् छय्लीगु पञ्जा ७ हजार थान, मास्क (एफएफपी २ररएन९५, आइआइआर) ८०हजार थान, लाकां १ लाख थान, ख्वाः त्वपुइगु १ लाख थान, इन्फ्रारेड थर्मोमिटर १५ सय थान, पोर्टेबल पीसीआर मेसिन (कोरोना परीक्षण यायेगु मेसिन) न्यागः, पोर्टेबल पीसीआर रिएजेन्ट (कम्बो) ५० हजार थान, परीक्षण किट ५० हजार थान व नमूना संकलन यायेगु ट्युब ५०हजार थान न्याःगु खः ।

ने.सं. ११४० चौलाथ्व ५ (चैत १६)