पुलांम्ह जुजुया प्रस्तावं तरंग
येँ (नेपालभाषा टाइम्स)- पुलांम्ह जुजु ज्ञानेन्द्र शाहं म्हिगः प्रजातन्त्र दिवस कुन्हु छगू सन्देश जारी यासें राजनीति पार्टीतलिसे सहकार्य यानाः न्ह्याः वने नु धकाः तयादीगु प्रस्तावं देय्या राजनीतिइ छगू न्हूगु तरंग हया बिउगु दु ।
पुलांम्ह जुजु शाहं तयादीगु थ्व प्रस्तावयात राजनीतिक पार्टीतय्सं खास हे महत्व मबिउसां देय्या राजनीतिक वृत्तय् धाःसा थुकियात कयाः चर्चा जूगु खनेदु ।
म्हिगः विराटनगर थ्यंम्ह एमाले अध्यक्ष केपी ओलीं न्हापा जुजुपिंसं शासन चले याःगु २४० वर्ष तक देशय् छु जुल ले धइगु न्ह्यसः तसें गणतन्त्र वःगु नकतिनि १५ दँ जुल, थ्वं बुलुहुँ ज्या याना वनी धइगु प्रतिक्रिया बियादिल ।
शाहया प्रस्तावयात दलीय रुपं सुना नं लिसः मबिउनिसां जुजुवादी पार्टी राप्रपाया उपाध्यक्ष रविन्द्र मिश्रं धाःसा थ्व छगू सकारात्मक प्रस्ताव खः धयादीगु दु । अथे हे ज्ञानेन्द्र शाहपाखें तम्वयाः अलग्ग च्वनाच्वंम्ह पुलांम्ह पञ्च नेता कमल थापां नं शाहया प्रस्ताव समसामयिक जू धासें थ्व न्हापा हे वयेमाःगु प्रस्ताव खः धयादीगु दु ।
ज्ञानेन्द्र शाहं राजनीतिक दलतय्त नापं जानाः वने नु धकाः तयादीगु थ्व न्हापांगु औपचारिक प्रस्ताव खः । तर देशय् जुजु समर्थक राजनीतिक पार्टीत दयेके दयेकं ज्ञानेन्द्र स्वयम् थम्हं हे थज्याःगु प्रस्ताव छाय् तये माल धइगु न्ह्यसः राजनीतिक ख्यलय् पिहां वःगु दु । थज्याःगु प्रस्ताव राजनीतिक रुपं राजनीतिक दलतय्पाखें हे वयेमाःगुली पुलांम्ह जुजु थम्हं हे थज्याःगु प्रस्ताव तःगुलिं वय्कःयात राजेन्द्र लिङदेन नेतृत्वया राप्रपाप्रति नं विश्वास मदया वंगु खः लाकि धकाः आशंका नं याना हःगु दु । ज्ञानेन्द्र शाहं बियादीगु वक्तव्यया लेखन तक नं थाय्थासय् अशुद्ध जूगु व उकी राजनीतिक गहिराइ मगाःगु खँ विज्ञतय्सं धाःगु दु ।
वक्तव्यय् देशय् अस्थिरता कायम जुयाच्वंगु, अस्तित्वय् संकट वयाच्वंगु आदि थीथी खँ न्ह्यथनातःगु दुसां अज्याःगु संकटपाखें मुक्त जुइगु लागिं राजतन्त्र व राजनीतिक दलत मिले जुयाः गुकथं न्ह्याः वनेगु धइगु छुं योजना धाःसा उल्लेख जुयाच्वंगु मदु ।
आः देय्या राजनीतिइ राजतन्त्रयात छुं नं कथंया भूमिका वा अधिकार बीगु सम्भावना मदु । राप्रपां राजतन्त्रयात तसकं कम सहित थापना जक यायेगु ल्याखं पुनस्र्थापना यायेमाः धइगु प्रस्ताव न्ह्यःने हयाच्वंगु दु । तर पुलांम्ह जुजु ज्ञानेन्द्र शाहं धाःसा थःपिनि भूमिका सहित राजतन्त्र पुनस्र्थापनाया खँ न्ह्यःने हयादीगु दु । वय्कलं थज्याःगु प्रस्ताव सुयाके सल्लाह यानाः तयादीगु खः धइगु खँ नं स्पष्ट मजूनि ।
वय्कलं तयादीगु थ्व प्रस्तावयात थःत जुजुवादी धकाः दावी याइपिं राप्रपा व मेमेगु शक्तितय्सं आः गुकथं क्वबिया यंकी धइगु खँ धाःसा स्वये मानिगु खनेदु । राप्रपां नं थुकियात पार्टीगत रुपं अनुमोदन याःगु मदुनि ।
LEAVE YOUR COMMENTS