विश्व सम्पदा दिवस औपचारिक रुपं क्वचाल
येँ- विश्व सम्पदा उत्सव मूल समारोह समितिया ग्वसालय् छवाःयंकं न्ह्याःगु विश्व सम्पदा दिवस वंगु शनिवाः क्वचाल । वंगु बैशाख २ गतेनिसें थीथी ज्याझ्वः यासें न्ह्याःगु उत्सवया लिपांगु न्हि वंगु शनिवाः थनया बसन्तपुलिं छगू सांस्कृतिक झाँकी सहितया सम्पदा पदयात्रा यानाः स्वयम्भूइ थ्यंकाः क्वचायेकूगु खः ।
विश्व सम्पदा दिवसया लसताय् लाकाः येँ महानगरपालिकां विश्व सम्पदाया धलखय् लानाच्वंगु थनया हनुमानध्वाखा लाय्कूनिसें मेगु विश्व सम्पदास्थल स्वयम्भू तकयात सम्पदा मार्गया रुपय् विकास यायेगु ल्याखं सम्पदा पदयात्रा ज्याझ्वः याःगु खः ।
समापन ज्याझ्वलय् नवासें संस्कृति, पर्यटन व नागरिक उड्डयन मन्त्री रवीन्द्र अधिकारीं स्वनिगलय् पर्यटकत बहनि लिबाक तक नं न्यासि वने फइगु वातावरण दयेका वनेमाःगु खँय् बः बियादिल । वय्कलं स्वनिगःया आवश्यकतायात कःघायेकथं बहनि लिबाक तक नं चाःहिले फइगु वातावरण व्यवस्थापन यायेमाः धयादिल ।
बहनि ११ बजेतक नं पर्यटकत धुक्क जुयाः चाःहिले फइगु वातावरण दयेके फत धाःसा अप्वः अप्वः पर्यटकयात आकर्षित याये फइ धासें यदि थथे याये फत धाःसा स्वनिगःया मेगु म्होतिं नं नीगू थासय् पर्यटक दुकाये फइगु वय्कलं धयादिल ।
ज्याझ्वलय् येँ क्षेत्र नं ७ या प्रतिनिधिसभा सदस्य रामवीर मानन्धर व क्षेत्र नं. ८या जीवनराम श्रेष्ठ नापं येँ महानगरपालिकाया प्रमुख विद्यासुन्दर शाक्य लगायतं स्वनिगःया सम्पदा संरक्षण यायेमाःगु, सम्पदा क्षेत्र दुनेया पदमार्गया माध्यमं पर्यटन ख्यःयात तिबः बी फइगु व थुकिं स्थानीयतय् आर्थिक स्थिति नं बल्लाइगु विचाः तयादीगु खः ।
स्वनिगः दुने दकलय् सतिक लाःगु निगू सम्पदास्थल हनुमानध्वाखा लाय्कू व स्वयम्भयू तकया सांस्कृतिक, धार्मिक, ऐतिहासिक व पुरातात्विक ल्याखं महत्वपूर्ण थाय्या प्रचार प्रसार व पर्यटकीय आकर्षण दयेकेगु ल्याखं छवाःयंकं थीथी ज्याझ्वः जूगु खः । थ्व हे झ्वलय् विश्व सम्पदा दिवस समापनया दिं कुन्हु हे लाकाः नेपाल लिपि गुथिं लिपि च्वज्या व ब्वज्या याःगु खः ।
LEAVE YOUR COMMENTS