हनुमानध्वाखा बन्दय् असन्तुष्टि

येँ (नेपालभाषा टाइम्स)- येँ महानगरपालिकाया शुक्रवाः जूगु नगरसभाय् २३ वडाया वडा अध्यक्ष मचाराजा महर्जनं येँ मनपां हनुमानध्वाखाय् सवारी साधन दुमकायेत बिउगु निर्देशनयात कयाः असन्तुष्टि प्वंकादीगु दु ।

नगरसभाय् थःगु खँ तयेगु झ्वलय् वडा अध्यक्ष महर्जनं धयादिल, ‘कन्हसंनिसें हनुमानध्वाखा परिसरय् तालं ग्वयेगु निर्देशन बिउगु खनिं, जिपिं प्यंगू वडा व अनया स्थानीय बासिन्दा च्वनाः सहलह यानाच्वनागु दु, समितिलिसे सहलह यानाः ३१ गते तक निष्कर्ष पिकोगु कथं ज्या यानाच्वनागु दु ।’

वय्कलं न्ह्यसः तसें धयादिल, ‘जिमिसं वडां हे ज्या यानागुली च्यालेन्ज याःगु खः ला ? जिमसिं सहलहया ज्या यानाच्वनागु दु, अथे यायेमते, सुनां निर्देशन बिउगु खः ? बालेन साह वा नगर प्रहरी बल प्रमुख राजुनाथ पाण्डें ? उकिया लिसः माल ।’

बैठकय् नगरसभाय् ब्वति काःपिं दुजःतय्सं फुटपाथ व्यापार निषेध जक यायेगु मखु उकियात व्यवस्थापन यायेमाःगु माग नं याःगु खः ।