धुँयात बुकेगु ल्वाभः
विश्वयात हे
मसां यानाछ्वयेगु तातुनाः
फय् सिबय् नं बेटोडं
सः सिबय् नं याकनं
न्यंकभनं हे न्यना वयाच्वन
जंगलं पिहांवःपिं धुँत ।
रक्तबीज हे अजूचायेक
जंगलया सिमात सिबय् नं यक्व
अणु अणुइ विभाजित जुजुं
वयाच्वन धुँत ।
सदिं निसें
पित्याःम्ह थें च्वंक
म्हुतु वांखानाः
ल्ययाः ल्ययाः
मनूत
नुं वयाच्वन धुँत ।
सावधान मनूत
सावधान
धुं लाफः पी धुंकाः
क्वारेन्टाइनय् च्वनेगु धयागु
थुइकि
व मृत्यु सिबय् नं भयावह ।
मृत्यु वइगु पीरय्
मृत्यु पियाच्वनेगुया पीडा
अहो !
…………………………….।
व महामृत्यु
क्वारेन्टाइनय् च्वंम्हेसिया जक मखु
क्वारेन्टाइनय् मच्वंपिं वया
जःपिनिगु नं जुइ ।
उकें
सावधान जु आः हे
सावधान !
सतर्कता हे थपाले
धुँयात बुकाछ्वयेगु
बल्लाःगु ल्वाभः खः ।
११४० चिल्लागा ८
LEAVE YOUR COMMENTS