सत्यमोहन लोक साहित्य भवनया जग स्वनेज्या

यल- सत्यमोहन लोक साहित्य भवन निर्माणया निंतिं जग स्वनेगु ज्या जुल । लोक साहित्य परिषद्या नायः प्रा. पे्रमशान्ति तुलाधरं जगस्थलय् पुजा यासें भवनया निंतिं विधिपूर्वक जग स्वनादीगु खः । थनया बखुंबहाःलय् च्वंगु सत्यमोहन जोशीया छेँय् उगु भवन दयेकेत्यंगु खः । वाङ्मय शताब्दीपुरुष जोशीं थःगु भागय् लाःगु जग्गा भवन दयेकेत छुं दिं न्ह्यः जक दान बियादीगु खः । वय्कः थौंकन्हय् च्वंनादीगु छेँय् थुनाः उगु हे थासय् लोक साहित्य भवन दयेकेत्यंगु खः ।

भाजु जोशीं छुं दिं न्ह्यः जक थम्हं भोगचलन याना वयाच्वंगु छेँ भवन दयेकेत दान बियादीगु खः । यल महानगरपालिकाया प्रमुख चिरिबाबु महर्जनया विशेष उपस्थितिइ वय्कःलिसें परिषद्या नायः प्रा. तुलाधर, शताब्दीपुरुष जोशी, ई. राजदास श्रेष्ठं मंकाःकथं पुजा यानाः जग स्वनादिसें थःथःगु नुगःखँ नं तयादीगु खः ।

मुक्कं प्यतँत्या जाःया उगु भवनया निंतिं छगू करोड न्यय्गू लाख लागत तुइगु अनुमान यानातःगु दु । भवन निर्माणया निंतिं प्रतिनिधिसभा सदस्य कृष्णलाल महर्जनं सांसद कोषपाखें ५० गू लाख, परिषद्या नायःपाखें १,११,१११ तका, ई. श्रेष्ठं ५० द्वः व समाजसेवी मोतिशान्ति शाक्यं २५ द्वः ग्वाहालि यानादीगु खः । नेपाःया लोक साहित्यया संरक्षण यायेगु ताःतुनाः उगु भवन दयेकेत्यंगु खः ।