छन्हुं झिंप्यंगू थासय् हिदान ज्याझ्वः

यल- नेपाल स्वयंसेवी रक्तदाता समाजया आह्वानय् वंगु शनिवाः येँ, यल व ख्वपय् छन्हुं १४ गु थासय् हिदान ज्याझ्वः जुल । उकीमध्ये येँय् गुंगू, ख्वपय् निगू व यलय् स्वंगू थासय् हिदान ज्याझ्वः जूगु खः । कोरोना भाइरसया सन्त्रासया दथुइ हिया आपूर्ति समस्या मजुइमा धइगु ल्याखं समाजया आह्वानय् हिदान ज्याझ्वः जूगु खः ।

यलया जावलाख्यलय् लायन्स क्लब अफ अल्का व अल्का अस्पताल प्रा.लि.या मंकाः ग्वसालय् जूगु हिदान ज्याझ्वलय् ५२ म्हेसिनं हिदान यानादीगु खः । भगवान केसीया संयोजनय् जूगु हिदान ज्याझ्वलय् समाजया अध्यक्ष पे्रमसागर कर्माचार्य, लायन्स क्लबया डिस्ट्रिक्ट गभर्नर शोभा जोशी, लायन्स क्लब अल्का अध्यक्ष नवराज थापा, निर्देशक विद्या श्रेष्ठ थापा, अस्पतालया अध्यक्ष कुमार थापा लगायतया सहभागिता दुगु खः।

अथे हे यलया लबिम मलय् जूगु हिदान ज्याझ्वलय् ७२ म्हेसिनं हिदान यानादीगु ज्याझ्वलय् समाजया अध्यक्ष कर्माचार्य व केन्द्रीय रक्तसंचार सेवाया निर्देशक डा. मनिता राजकर्णिकारया उपस्थिति दुगु खः ।