‘नेपाः व पाकिस्तानयात छगू हे व्यवहार’

येँ – नेपाली कांग्रेसया सभापति लिसें पुलांम्ह प्रधानमन्त्री शेरबहादुर देउवां भारतं नेपाःयात नं पाकिस्तानया कोटीइ तयाः व्यवहार यानाच्वंगु द्वपं बियादीगु दु । लिपांगु इलय् भारतं सार्वजनिक याःगु राजनीतिक नक्साया कारणं भारतं नेपाःयात नं पाकिस्तानयात याइथेंज्याःगु हे व्यवहार यानाच्वन धकाः वय्कलं द्वपं बियादीगु खः ।

म्हिगः विराटनगर विमानस्थलय् पत्रकारतलिसे खँ ल्हासें देउवां धयादिल, ‘भारतया व्यवहार पाकिस्तान व नेपाः बराबर थें खनेदुगु दु, आः हे वयाः नक्सा छाय् छापे यात ? भारतं न्हापा काश्मीरयात थःगु भूभागय् लाकाः नक्सा छापे यात, अनं लिपा नेपाःया भूभाग नं थःगु नक्साय् दुथ्याकाः छापे यात, थुकिं भारतं नेपाः व पाकिस्तानयात याःगु व्यवहार बराबर खत ।’

नेपाः व भारत दथुइ सीमा विवाद दुगु खँ भारतीय पक्षं नं सिउगु खँ धासें आः हे छाय् नेपाःया भूभाग दुथ्याकाः राजनीतिक नक्सा छापे यात धकाः नं वय्कलं न्ह्यसः तयादिल । सभापति देउवां थः प्रधानमन्त्री जुयाच्वंगु इलय् महाकाली सन्धी जूगु व उगु हे खुसियात सीमा माने यायेगु सहमति जूगु खः धासें सीमा विवादय् प्रधानमन्त्री ओलीं भारतलिसे खँ ल्हाये मफुगु द्वपं नं बियादिल ।

वय्कलं सीमा विवादयात कयाः नेपाःया राजनीतिक पार्टीतय् दथुइ ‘अभूतपूर्व एकता’ जूसां नं प्रम ओलीं धाःसा भारतलिसे खँ ल्हाये मफुगु खँय् दुःख प्वंकादिल ।थ्वहे झ्वलय् सीमा बचाउ अभियानकर्तातय्सं कालापानी नेपाः दुने दुथ्याकाः पिकाःगु न्हूगु नक्सा नेपाःया थीथी सरकारी ज्याकुथी तये यंकूगु दु ।