अन्ततः महरा नं दौरा सुरुवाःपाखे

येँ – अन्ततः माओवादी नेतातय्सं नं बुलुहुँ राष्ट्रिय पोशाक धयातःगु दौरा सुरुवाः हे ग्रहण शुरु याना हःगु दु । म्हिगः सभामुख पदय् निर्विरोध निर्वाचित जुयादीम्ह माओवादी नेता कृष्णबहादुर महरां दौरा सुरुवाः फिनाः पद व गोपनीयताया शपथ ग्रहण यानादीगु खः । म्हिगः जूगु संसदया बैठक नं वय्कलं दौरा सुरुवाः फिनाः हे सञ्चालन यानादीगु खः ।

थ्व स्वयां न्ह्यः निक्वः तक मन्त्री व उपप्रधानमन्त्री समेत जुयादीगु इलय् तकं वय्कलं दौरा सुरुवाः फिनामदीगु खः । म्हिगः वय्कःयात ‘आकाझाकां’ दौरा सुरुवाः फिना वःगु खनाः शपथ ग्रहण समारोहय् वःपिं मनूतय् दथुइ खासखुस समेत जूगु खः ।

थ्व स्वयां न्ह्यः उपराष्ट्रपति जुया–दीम्ह माओवादी नेता नन्दबहादुर पुनं दौरा सुरुवाः फीगु यानादीगु खःसा व स्वयां नं न्ह्यः माओवादी पोलिटब्युरो दुजः समेत जुयादीम्ह टोपबहादुर रायमाझीं मन्त्री जूगु इलय् दौरा सुरुवाः फीगु शुरु यानादीगु खः । लुमंकेबहः जू, छुं न्हि न्ह्यः रायमाझीया बौ मदुगु इलय् अन्तिम संस्कारया लागिं लं त्वःतूबलय् वय्कःया म्हय् जनै चिनातःगु किपा सामाजिक सञ्जालय् भाइरल जूगु खः ।

माओवादीया अध्यक्ष पुष्पकमल दाहाल व वरिष्ठ नेता डा. बाबुराम भट्टराईनं धाःसा प्रधानमन्त्री जूगु इलय् नं दौरा सुरुवाः मफिउगु खः ।
प्रधानमन्त्री केपी ओलीं थः प्रम नियुक्त जूगु न्हि कुन्हु हे सांसदतय्त सम्बोधन यासें आः संसद वयेबलय् सकस्यां पोशाकय् ध्यान बियादिसँ धकाः निर्देशन बियादीगु खः ।