प्यक्वःगु उदाय कप फुटसल कासा

येँ – उदाय समुदाय दुनेया छगू कवः स्थापित खलः अन्तर्गतया स्थापित ल्याय्म्ह पुचःया ग्वसालय् प्यक्वःगु उदाय कप फुटसल कासा जुल । वंगु शनिवाः जूगु कासाया उलेज्या संघीय संसदया दुजः नापं नेपाल ओलम्पिक कमिटीया अध्यक्ष जीवनराम श्रेष्ठ व समाजया नायः डा. रुपज्योति कसालं रेफ्रियात बलः लःल्हानाः यानादीगु खः ।

कासाय् उदाय समुदाय दुनेया थीथी कवः स्थापित खलः, असंया तुलाधर, न्यतया तुलाधर, कसाः तःधं सेवा गुथि, ताम्राकार (तवः) समाज लगायतया पुचलं ब्वति काःगु खः । कासाय् न्हाप, लिउ व लियांलिउयात शील्ड, पदक व दसिपौ लःल्हायेगु नापं उत्कृष्ट कासामियात नं पुरस्कृत यायेगु ग्वसाः खलकं जानकारी बिउगु दु ।

थनया ताहाचः, बाफःस्थित युनाइटेड फुटसलय् जूगु न्हापांगु कासाय् ताम्राकार समाजं न्यत तुलाधरयात बुकाः सेमी फाइनलय् दुहां वंगु दु ।