नेपाःया मत भारतं मन्याइगु सम्भावना
येँ (नेपालभाषा टाइम्स)÷नेपालय् अप्वः उत्पादन जूगु मत भारतयात मीगु नेपाःया तयारी पूमवनीगु संकेत वःगु दु । भारतय् हे थौंकन्हय् माग स्वयां अप्वः मत उत्पादन जुयाच्वंगुलिं नेपालं भारतयात मत मीगु म्हगस छखे लाइगु संकेत खने दया वःगु खः।
भारतया केन्द्रीय विद्युत प्राधिकरण (सीईएं) वइगु दँ २०१८÷१९ स भारतय् मतया आपूर्ति अप्वइगु खँ धाःगु दु । भारतया प्राधिकरणया कथं म्होतिं २.५ निसें अप्वलय् ४.६ प्रतिशत तक अप्वः मत आपूर्ति जुइगु जूगुलिं नेपालय् अप्वःगु मत भारतं मन्याइगु सम्भावना खने दया वःगु खः ।
बर्खाया इलय् नेपालय् अप्वः जूगु मत भारतयात मीगु तयारी यानाच्वंगु खः । नेपाःया अप्पर तामाकोशी आयोजना थुगु दँय् क्वचाइगु जूगुलिं नेपाल विद्युत प्राधिकरणं अप्वःगु मत भारतयात मीगु कथं तयारी यानाच्वंगु खः । अप्पर तामाकोशी पूरा जुल धाःसा ४५६ मेगावाट मत उत्पादन जुयाः भारतय् निर्यात यायेमालीगु अवस्था वइ । तर आः भारतय् हे मत अप्वः उत्पादन जूगुलिं थ्व मत छु यायेगु धइगु अन्योल ब्वलनाच्वंगु खँ धाःगु दु । थुगु दँय् जक नेपालय् सम्पन्न जुइगु आयोजनापाखें ७५४ मेगावाट मत उत्पादन जुइगु अनुमान यानातःगु दु ।
थुगु दँय् नं नेपालय् माग स्वयां अप्वः मत उत्पादन जूगु दु । नेपालय् न्हापा नेपाल विद्युत प्राधिकरणं प्रक्षेपण यानातःगु स्वयां १०० मेगावाट मत केन्द्रीय प्रसारण लाइनय् दुगु खः ।
नेपालय् थुगु दँय् मतया माग अप्वयाः १३०० मेगावाटंनिसें १४०० मेगावाट जुइगु प्रक्षेपण यानातःगु खः । तर प्रक्षेपण याःगु कथं मतया माग मजुइवं बर्खा इलय् अप्वः उत्पादन जुइगु यानाच्वंगु दुसा सुख्खा इलय् म्हो जक उत्पादन जुयाः भारतं आयात यायेमाःगु अवस्था वयाच्वंगु दु ।
नेपाःया अप्वः धयाथें विद्युत आयोजना रन अफ रिभरय् आधारित जुयाच्वंगुलिं थज्याःगु समस्या वःगु खः ।
LEAVE YOUR COMMENTS