ने. सं. ११४६ अनलाथ्व अष्टमी -

महराया पद छु जुइ ? निर्दाेष जूगु नित कारण

येँ -पुलांम्ह सभामुख कृष्णबहादुर महरा येँ जिल्ला अदालतपाखें निर्दोष ठहर जुसें रिहा जुइवं आः वय्कःया सांसद व सभामुख पद छु जुइ धइगु न्ह्यसः पिहां वःगु दु ।
विज्ञ सूत्रं धाःकथं वय्कःया सभामुख पदय् मेम्ह हे (अग्नि सापकोटा) वयेधुंकूगु कारणं थ्व पद ला वय्कःयात लिहां वइ मखुत, तर वय्कःया सांसद पद धाःसा कायम हे जुइ । वय्कःयात ज्वनाः कारागारय् कुनातःगु १३४ न्हि बाहेक मेगु न्हि वय्कःया सांसद पद सुरक्षित जुइ । तर थुकिया लागिं वय्कलं अदालतं जारी याःगु फैसलाया पूर्ण पाठ हयाः संसदयात बुझे यायेमाः । वयां लिपा वय्कःया सांसद पद हानं लिहां वइसा वय्कः पुनः संसद वने दइ ।
वय्कःयात संसदया छम्ह मिसा कर्मचारीं बिउगु द्वपंया आधारय् कुना बिउगु कारणं वय्कःया सभामुख पद छगू गुमे जूवन । उकिं गुलिसिनं वय्कःयात सभामुख पदं चीका छ्वयेगु लागिं हे जक थ्व ‘नाटक’ रचना जूगु खः धायेगु याना हःगु दु । भाजु महरां थौंकन्हय् विवादय् लानाच्वंगु एमसीसी सम्झौतायात संसदय् हयेगु ज्या तकं मयाःगु कारणं प्रधानमन्त्री वय्कः खनाः तम्वयाच्वंगु खँ पिदनाच्वंगु खः । सरकारं महरा मदुगु इलय् लाकाः एमसीसी सम्झौता पारित याकेगु कुतः याःगु खःसां पार्टी दुने हे थुकियात कयाः विवाद पिहां वःगुलिं प्रस्ताव न्ह्यःने मवंगु खँ नं सूत्रं धाःगु दु ।
भाजु महरायात अदालतं सफाई बिउसां वय्कःया राजनीतिक जीवन आः न्हापा थें याउँक न्ह्याइ लाकि मन्ह्याइ धइगु न्ह्यसः धाःसा पिहां वयाच्वंगु दु ।

निर्दोष जूगुया निता कारण
महरायात निर्दोष ठहर यायेमाःगुया कारण निता दुगु खँ धाःगु दु । छगू ला वय्कःयात गुम्ह मिसां बलात्कारया द्वपं बिउगु खः, वं हे थःगु द्वपं लित कासें महरां थःत अज्याःगु छुं हे दुव्र्यवहार मयाःगु बयान अदालतय् बिउगु दु । थुकिं यानाः महरायात यक्व राहत जुल । लिसें द्वपं बिउम्ह संसदया मिसाम्ह कर्मचारी रोशनी शाहीया क्वथाय् गुलि नं सामान तोडफोड जुयाच्वंगु खः, उकी महराया फिंगर प्रिन्ट मिले मजू धइगु रिपोर्ट पिहां वल । थुकिं यानाः नं वय्कःयात बियातःगु द्वपं पुष्टि मजुल । लिसें वय्कः वकुन्हु शाहीया छेँय् वन धइगु खँ नं पुष्टि मजूगु खँ अदालतं धाःगु दु । थुलिया हे आधारय् महरायात अदालतं निर्दोष साबित याःगु खः । जिल्ला अदालतया थ्व फैसला लिपा आः पुनरावलोकनय् वनेगु लाकि मवनेगु धइगु निर्णय धाःसा सरकारी वकिलतय्सं याइगु खँ धाःगु दु । थ्व बारे सरकारी वकिलं छुं न्ववाःगु मदुनि ।