सगरमाथा सफाइ अभियानय् कोकाकोला

येँ – लोकंह्वाःगु पेयपदार्थ उत्पादक कम्पनी कोकाकोलां सगरमाथां फोहर हयेगु निंतिं आःतकया दकलय् तःधंगु अभियान सुरु याःगु दु । कोकाकोलां केन्द्रीय, प्रोदेशिक व स्थानिय सरकार लिसें नेपाली सेना, नेपाल पर्वतारोहण संघ व एसपीसिसिलिसेया सहकार्यय् थ्व अभियान सुरु याःगु खः ।

‘क्लिन आवर प्राइड’ धयागु नारा बियाः सुरु याःगु थ्व अभियानं विश्वया दकलय् तजाःगु च्वापुगुँ सगमाराथाया पवित्रतायात सुरक्षित यानाः थनया स्वच्छायात ल्यंकातयेगु लक्ष्य तयातःगु दु । अभियान सुरुवात ज्याझ्वलय् न्ववानासें पर्यटन विभागया सामान्य निर्देशक डन्डुराज घिमिरें सगरमाथा सरसफाइ अभियान न्ह्याके हे त्यनागु इलय् कोकाकोला थेंज्याःगु कम्पनी अभियान दुथ्याःगु धयागु विशेष महत्वया खँ खः धयादिल ।

अथेहे अभियानया बारे न्ववासें खुम्ब पासाङ ल्हामु गाउँपालिकाया अध्यक्ष निम दोर्जी शेर्पां खुम्बु जःखःया हिमाली भूभागयात सफा व स्वच्छ यायेत कोकाकोला लिसें मेमेगु संस्थां याना वयाच्वंगु ग्वाहालिया निंतिं सुभाय् ब्वंकादिल । अथेहे नेपाल पर्वतारोहण संघया अध्यक्ष शान्तवीर लामा थ्व अभियानं नेपाल भ्रमण वर्ष २०२०यात नं तःधंगु ग्वाहालि याइगु खँ धयादिल ।

ज्याझ्वलय् न्ववासें कोकाकोला भारत व पश्चिम एशियाया सार्वजनिक मामिला, संचार व स्थिरता आयोगया उपाध्यक्ष इश्तेयाक अम्जदं फोहरमुक्त विश्व निर्माणया निंतिं आवश्यक फुक्क कथंया पलाः छीत कोकाकोला न्ह्याबलें तयार दु व मंकाः कुतलं जक थज्याःगु ज्या सम्भव जुइ धयागु खँ जिमिसं थू धयादिल । बोटलर्स नेपाल लिमिटेडया कार्यकारी निर्देशक प्रदीप पाण्डें सगरमाथा सफाइ अभियानया छगू ब्वः जुइदयाः थःपिं नं गौरवान्वित दुगु खँ कनादिल ।