धानवमार्ग पिचया न्हापांगु चरणया ज्या क्वचाल
येँ – त्रिभुवन अन्तर्राष्ट्रिय विमानस्थलया धावनमार्ग स्तरोन्नतिया झ्वलय् रनवे रिह्याबया मू ज्या क्वचाःगु दु । विमानसथलया ३ हजार ५० मिटर ताःहाकःगु धावनमार्गय् न्हापांगु चरणया पिच क्वचाःगु खँ विमानस्थलं धाःगु दु । नेपाल नागरिक उड्डयन प्राधिकरण (क्यान) अन्तर्गतया हवाई यातायात क्षमता अभिवद्धि आयोजनाया निर्देशक बाबुराम पौडेलं स्तरोन्नतिया न्हापांगु चरणया मू ज्या क्वचाःगु खँ धयादीगु दु । आः धावनमार्गइ् हाकनं सालुक पिच यायेगु ज्या जुइतिनि ।
ल्यं दुगु ज्या नं वइगु असार १५ गते दुने क्वचाइगु खँ धाःगु दु । आयोजनां वंगु चैत १८ गते निसें धावनमार्ग दयेकेगु ज्या न्ह्याकूगु खः । स्तरोन्नतिया ज्या सुरु याःगु स्वला तक न्हियान्हिथं बहनी बहनी धावनमार्ग पूवंक बन्द यानाः पिच याःगु खः । आयोजनाया सुचना अधिकृत दीपेन्द्र श्रेष्ठं निगूगु चरणया पिच तयेगु ज्या सुरु जुइधुंकूगुलिं आःया झिंन्यान्हु दुने धानवमार्गया स्तरोन्नतिया ज्या क्वचाइगु खँ धयादीगु दु ।
न्हापांगु चरणया क्वय्या लेयर २० सेन्टिमिटर पिच याःगु खः । आः निगूगु चरणय् ६.५ सेन्टिमिटर पिच याइ । धावनमार्गया स्तरोन्नतिया लिसें न्हापांगुखुसी रनवे सेन्टर लाइन लाइट नं जडान याःगु खः । मत जडान यायेगु ज्याय् आःतक ‘डट’ तयेगु ज्या क्वचायेधुंकूगु खँ धाःगु दु । थ्वयां न्ह्यव विमानस्थलया रनवेय् एज लाइट जक छ्यला वयाच्वंगु खः ।
स्तरोन्नतिया निंतिं नेपाली व चिनियाँ यानाः निसत्याम्हं मल्याक जनशक्तिं ज्या यानाच्वंगु दु । धावनमार्ग मर्मतया निंतिं माक्व सामग्रीया व्यवस्थापन लिसें पर्याप्त जनशक्ति परिचालन जुयाच्वंगु खँ धाःगु दु । ज्या तीव्रगतिं न्ह्यानाच्वंगुलिं निर्धारित ई स्वयां न्ह्यः हे क्वचाइगु खँ आयोजना निर्देशक पौडेलं धयादीगु दु ।
धावनमार्ग मर्मत ज्या क्वचायेवं सुरक्षित उडान अवतरण जुइगु, विमान होल्ड जुइगु समस्याया अन्त्य जुइगु खा धाःगु दु । नेपाःया छगू जक अन्तर्राष्ट्रिय विमानस्थलय् न्हापा इलय्ब्यलय् पिच हे ब्वला वइगुलिं तःधंगु समस्या जुइगु जुयाच्वंगु खः । विशेष यानाः वर्षा इलय् पिच ब्वलावयाः समस्या जुइगु खः । थ्व विमानस्थल सन् १९७५ य् दयेकुसां निसें थथे हे मर्मत यानाः संचालन यान ावयाच्वंगु दु ।
LEAVE YOUR COMMENTS