इन्टर्भेन्स्नल रेडियोलोजी सम्बन्धि अन्तर्राष्ट्रिय सम्मेलन
यल (नेपालभाषा टाइम्स)- देय्न्यंकंया सछिम्ह स्वयां अप्वः रेडियोलोजिस्टतय् सहभागिताय् अन्तर्राष्ट्रिय कार्डियोभास्कुलर व इन्टर्भेन्स्नल रेडियोलोजी सम्मेलन जूगु दु । रेडियोलोजिस्टतय्पाखें कार्डियाक इमेजिङया माध्ययमं थीथी ल्वय्या निदान यायेगु ज्या अझ सबल यायेगु ताः तयाः नेपाल मेडिसिटीं सम्मेलनया ग्वसाः ग्वःगु खः ।
रेडियोलोजी, चिकित्साख्यः छगू विद्या खः, गुकिं ल्वय् निदान र उपचार यायेत इमेजीङ प्रविधि छ्यली । थुकी नं इन्र्टभेन्स्नल रेडियोलोजी पद्वतीं शल्यक्रिया यायेम्वायेक इमेजिङया माध्यम उपचार याइ ।
ज्याझ्वलय् न्ववानादिसें नेपाल मेडिसिटीया अध्यक्ष डा. उपेन्द्र महतो विरामीतय्त सहज व याकनं सेवा बीत नेपाल मेडिसिटीं न्हूगु प्रविधि व पद्वतीया अद्यावधिक यानः न्ह्याः वयाच्वंगु खँ धयादिल । वय्कलं धयादिल, “शल्यक्रिया यायेम्वायेक प्रविधिया छ्यलाः उपचार यायेगु सुविधा नेपालय् दइगु धयागु थःथवय् हे सफलता खः । विश्वया स्वास्थ्य प्रणालीया न्ह्यःने नेपाः नं छुं नं प्रविधि व सुविधाय् लिउने मलाइकथं अस्पतालं ज्या याना वयाच्वंगु खँ कनादिल ।”
अथेहे अस्पतालया प्रिन्सिपल कन्सल्टेन्ट व रेडियोलोजी विभागका प्रमुख डा. राम कुमार घिमिरे देशय् दक्ष जनशक्ति विकास व रेडियोलोजी विधाया थीथी पक्षयात सवल यायेत थज्याःगु कथंया ज्याझ्वः व अन्र्तराष्ट्रिय सहकार्यं ग्वाहालि याइगु खँ कनादिल ।
देशन्यंकंया रेडियोलोजिस्टतय्पाखें ल्वय् म्हसीकेगु पद्धति व्यापक अभ्यास जुया वयाच्वंसां इन्र्टभेन्स्नल रेडियोलोजीया अभ्यास धाःसा म्हो हे जक जूगु खनेदु । रेडियोलोजिस्टतय्त थ्व बारे अझ सबल व सक्षम यायेत आवश्यक सिप व ज्ञान बीत नेपाल मेडिसिटीं थ्व सम्मेलनया ग्वसाः ग्वःगु रेडियोलोजि तथा भास्कुलर इन्र्टभेन्स्नल रेडियोलोजी विशेषज्ञ डा. ओम विजु पन्त कनादिल ।
सम्मेलनय् हस्पिटल अफ द युनिर्भसिटी अफ पेन्सिलभेनियाया रेडियोलोजी विभागका सहायक प्राध्यापक स्टेफेन हन्ट, राष्ट्रिय चिकित्सा विज्ञान प्रतिष्ठान (न्याम्स्) या डीन डा. आशेष ढुंगाना व रेडियोलोजिस्ट डा. हेन्सन खड्कां इन्टर्भेन्स्नल रेडियोलोजीबारे विस्तृत जानकारी बियादीगु खः ।
LEAVE YOUR COMMENTS